Duha ka Pakistanis patay

CEBU, Philippines — Duha ka Pakistani nationals ang nangamatay human nabanggaan ang ilang gisakyang minivan og tractor truck head diha sa eskina sa Barangay Guizo, Mandaue City, niadtong Miyerkules sa gabii, Hunyo 10, 2026.

Ang mga biktima giila nga silang Fate Muhammad, 38, driver sa pula nga Suzuki minivan, ug ang iyang pasahero nga si Inayat Ullah, 38, parehong Pakistani nationals ug mga trabahante nga nagpuyo sa Mandaue City.

Gikumpirmar ni Police Lieutenant Colonel Mercy Villaro-Kantuna, spokesperson sa Mandaue City Police Office (MCPO), nga bisan pa sa paningkamot sa mga doktor sa pag-resuscitate sa duha, namatay gihapon ang duha sa tambalanan.

“Gi-try og revive sa hospital pero namatay gyud,” matud pa ni Kantuna. Ang aksidente nahitabo mga alas 11:44 sa gabii sa intersection sa Ouano Avenue ug E.O. Perez Street duol sa S&R sa Barangay Guizo.

Base sa initial nga imbestigasyon sa pulisya, ang Suzuki minivan nitabok pa-northbound sa ikatulong lane sa Ouano Avenue samtang nakabangga kini sa usa ka Fuso tractor head nga pa-southbound sa inner lane. Matud sa mga pulis, ang tractor head nga gimaneho ni Samuel Macaraig Chavez, 39, nag left turn padulong sa E.O. Perez Street pero nabanggaan niini ang minivan.

“Base sa imbestigasyon, murag naa sa red light ang side sa Fuso truck nga kalit nga ni-left turn,” matud ni Kantuna. Grabe ang mga samad sa duha ka langyaw sa minivan ug dali silang gidala sa Mandaue City Hospital, pero gideklarang patay mga ala-una sa kadlawon niadtong Hunyo 11. Ang minivan naguba sa atubangan samtang ang tractor head  nagusbat pud ang atubangan.

Nailhan sa kapulisan ang mga langyaw human sa follow-up investigation. Ang drayber sa trak gikustodiya na sa kapolisan ug gikatakdang pasakaan og kaso. Kaso nga reckless imprudence resulting in double homicide ug damage to property ang ipasaka batok sa drayber.

Sa laing balita, usa ka Green GSM electric taxi ang naaksidente usab sa Barangay Subangdaku, Mandaue City kagahapon sa hapon, Hunyo 12.

Matud ni Traffic Enforcement Agency of Mandaue (TEAM) head Hyll Retuya, ang driver sa taxi giingong nakatulog samtang nagmaneho.

Walay namatay sa maong insidente, pero ang tulo ka sakay, apil ang driver, nasamdan.

Sa usa ka post sa social media, makita ang grabeng kadaot sa green taxi. Ang driver gi-detain sa MCPO Traffic Enforcement Unit (TEU), sumala pa ni Retuya.

Si Kantuna nagkanayon nga wala nag i-blotter ang maong hitabo tungod kay walay kontra ang maong green taxi.

“Self accident. Then naa man siyay duha ka pasahero nga slightly injured, gahimo ra daw sila ug compromised agreement. Ang green taxi ray mo shoulder sa unsay mga expenses sa duha ka passenger,” matud pang Kantona sa Banat News. — IBM BANAT NEWS