Nanghasi mao hinuoy natigbasan patay

CEBU, Philippines — Patay ang usa ka 30-anyos nga lalaki human kini giingong gitigbas sa iyang higala atol sa komprontasyon sa duha diha sa Barangay Balud, niadtong Huwebes sa hapon, Hunyo 11.

Ang biktima giila nga si Jonard Baceite, 30, residente sa Sitio Amonsal, Barangay Catolohan, Dalaguete. Samtang ang suspetsado mao si Ponciano Belia Pueblo alyas “Poncing,” residente sa Barangay Balud, nga nadakpan sa mga otoridad human sa insidente.

Base sa imbestigasyon sa Dalaguete Municipal Police Station, si Baceite nagpuyo sa balay sa suspetsado sulod sa duha ka adlaw sa wala pa nahitabo ang insidente.Matud sa kapolisan, ang suspek nangangkon nga natulog kini sa ubos nga bunk sa double-deck nga katre sa dihang miabot si Baceite ug kalit niining gihapak ang salog sa upper deck nga nakapakurat sa suspetsado.

Pagmata ni Pueblo, mibangon kini ug niinom og tubig, apan gikatahong wala gihapon kini lung-i og bikil sa biktima ug gihagit naman hinuon siya niini og away hinungdan sa ilang panagbugno apan niresulta ni sa pagpanigbas. Bisan og naigo sa likod, liog, ug papangig, nakadagan pa ang biktima gawas sa balay. Nakuha pa sa CCTV daplin sa dalan ang paggukod kaniya sa suspek. Matud pa sa mga polis naabtan sa suspek ang biktima ug giusban kini og tigbas.

Gidala ang biktima sa Municipal Health Office sa Poblacion, Dalaguete, apan gideklarar nga dead on arrival sa mga doktor.Human sa insidente, miikyas ang suspetsado apan nadakpan ra sa mga pulis.

Sa imbestigasyon usab sa kapolisan, nahibaw-an nga ang biktima adunay kaso nga frustrated murder niadtong 2017. Ang suspetsado usab giingong aduna say record sa kapolisan apan wala na gidetalya sa mga polis kun unsa nga mga kaso. — IBM BANAT NEWS