Angel Castro mipasilong sa VMX

CEBU, Philippines — Misulod na sa kalibotan sa pagpa-sexy  ang kanhi Kapuso actress nga si Claire Castro nga nagtangag na og bag-ong screen name nga Angel Castro.

Nasayran nga wala na mo-renew   ang aktres sa iyang kontrata sa Sparkle GMA Artist Center.

Mipasilong na karon si Angel sa VMX  (kanhi Vivamax)  busa nakalinya na ang iyang sexy projects. 

Batang Quiapo  gi-ere sa 41 ka nasud sa  Africa

Kasamtangang gi-ere  sa 41 ka nasud sa Africa ang   hit series ni Coco Martin nga  “FPJ’s Batang Quiapo”  pinaagi sa StarTimes channel.  Kahinumdoman nga puwerting sikata sa maong  primetime series sa Pilipinas gikan niadtong  2023 hangtod sa unang bahin karong tuiga .

Gi-dub na usab kini sa laing pinulongan nga sama sa   English, Portuguese, ug French .

Didto sa   Africa , nagtangag kini sa titulo  nga  “Gangs of Manila” .

Dungan sa kalampusan sa “FPJ’s Batang Quiapo” sa Africa, gipaabot usab sa fans ang pagbalik ni Coco sa primetime kauban si Julia Montes alang sa umaabot nga action-romance series nga “Sigabo.”

Maghikay Festival 2026 , napuno sa hugyaw nga mga pasundayag

Nagmalampuson og  puno sa kolor, kultura, ug kadasig ang ikaduhang Maghikay Festival 2026 nga gihimo sa Barangay Maguikay, Dakbayan sa Mandaue sa niaging  adlaw.

Gisalmotan kini sa upat ka contingents nga nagrepresentar sa nagkadaiyang clustered sitios sa maong barangay, diin ilang gipakita ang ilang talento sa sayaw, pasundayag, ug pagpasigarbo sa kultura sa Maguikay.

Ang maong kalihokan nahimong posible pinaagi sa suporta sa mga opisyal sa barangay nga gipangulohan ni Barangay Captain Eduardo Gumera ug SK Chairman Jack Oplado, kauban ang ilang mga konsehal .  Mas nahimong engrande ug organisado ang tibuok pista tungod sa direksyon ug pagdumala ni Jay-R Yosores sa DMY Events, nga nakahatag og dakong tampo  sa kalampusan sa maong kalihokan . Gawas sa ritual showdown ug street dancing competition, nisidlak usab ang kaanyag, ug kaambong,  sa mga nisalmot  sa Maghikay Festival King ug Queen 2026. Nahimong sentro sa atensyon ang ilang mga pasundayag nga nakadugang sa kasadya sa maong kompetisyon.

Nakadaog  sa ritual showdown o Best in Group Performance mao ang  contingent  no. 4 nga gikan sa  cluster  nga “Maghikaynong Mananayaw sa Katingbang Madcenwebe.” Gawas sa maong kadaugan, ilang naangkon ang daghang espesyal nga mga pasidungog lakip na ang Best in Street Dancing, Best in Choreographer, Most Disciplined, Best in Andas, Best in 1-Minute Intro Video, Best in AVP, ug Best in Group Costume.

Nakuha usab sa maong contingent ang mga pasidungog nga Festival King ug Festival Queen Best in Production Number, Festival King ug Festival Queen Solo Performance, Best Festival Queen Costume, ug ang labing gitinguha nga korona sa Maguikay Festival King 2026 ug Maguikay Festival Queen 2026.

Ang  ubang contingents nga niapil  sa kompetisyon mao ang Maampo-ong Lumad Maguikaynon sa Lumavacion, Masidlakong Banay sa Kalinga Tres Ligajig, ug Hugpong sa Nagkahiusang Mananayaw sa Calnayam, nga tanan nagpakita sa ilang paningkamot ug gugma alang sa kultura ug tradisyon sa Barangay Maguikay.