15 surrogate mother nasagip, 3 arestado!

Healthcare facility ni-raid ng NBI...

MANILA, Philippines — Sinalakay ng mga ahente ng National Bureau of Investigation–Human Trafficking Division (NBI-HTRAD) ang dalawang pasilidad na nagsisilbing surrogacy hubs kung saan dinakip ang tatlong suspek at nasagip naman ang 15 surrogacy mother, sa Porac, Pampanga noong Hunyo 10.

Nag-ugat ang operasyon sa reklamo ng isang surrogate mother laban sa House of Surrogacy PH (HOS PH) na sinasamantala umano ang mga kababaihang salat sa pera.

Isang mapanlinlang na kasunduan umano ang pinalalagdaan sa mga biktima para ipagbuntis ang anak ng adoptive parents at kabilang din ang birth certificates ng mga sanggol ay nilalagyan ng palsipikadong detalye.

Sa beripikasyon sa Department of Health, nakumpirma na hindi lisensyado o accredited ang HOS PH bilang healthcare facility.

Sa pakikipag-ugnayan sa NBI-Central Luzon Regional Office (NBI-CELRO) at Municipal Social Welfare and Development Office (MSWDO) ng Porac, Pampanga, isinagawa ang magkasabay na operasyon sa dalawang pasilidad ng HOS PH at nadatnan ang 15 surrogate mothers.

Inaresto naman ang tatlong indibidwal na nagpapatakbo o namamahala ng dalawang pasilidad.