Higala nga magselos

Dear Tito Miguel ,

Maayong adlaw , paborito kaayo nako ang imong lindog dinhi sa Banat News . Kanunay gyud ko mag-atang niini matag Biyernes ug Lunes . Ako diay si Giana ,  23 anyos , taga San Fernando , Cebu .

Duna ko’y  soud nga higala nga lalaki nga ginganlan og Matt . Dugay na mi nga nagkaila ug sa tanan nakong mga problema ug kalisdanan, pirmi siya naa aron maminaw ug motabang nako. Dili lang kay concern siya, apan usahay murag sobra kaayo iyang pagpanalipod kanako.

Sa matag higayon nga adunay lalaki nga moduol o mahimong suod nako, dali ko makabantay nga mausab iyang lihok. Usahay mangutana siya kung kinsa ang lalaki, unsay among relasyon, ug usahay murag dili siya ganahan nga adunay lain nga lalaki nga modoul  nako. Makabantay pud ko nga usahay murag masuko o magselos  siya .

Tungod kay nalibog na gyud ko sa iyang mga binuhatan, nakahukom ko nga pangutan-on siya kung unsa ba gyud ang iyang tinuod nga pagbati dinhi kanako. Niana ko kaniya kung ganahan ba siya nako o higala lang gyud . Apan ang iyang tubag mao nga concern ug protective lang gyud siya isip usa ka loyal nga higala.

Gusto ko mangayo sa imong  tambag. Dili ko gusto nga mag-assume ug masayang among panaghigalaay, apan dili na pud ko komportable nga magpabiling maglibog sa sitwasyon.  —Giana

* * *

Giana,

Nakaako na man ka’g pangutana kun ganahan ba siya nimo ug iyang tubag kay friend  ra ka niya, pangutan-a na sad nga kun para niya higala ra mo, ok ra ba niya manguyab ka’g lain?

Diha nimo makita unsa gyud ka para niya. Lagmit diha siya mapugos pag-angkon sa unsa’y tinuod niyang gibati nimo. Kun moingon okay  ra manguyab ka total higala ra man mo, ingna dayon buot pasabot okay  ra niya nga modistansiya na ka niya kun makauyab ka, isip respeto sa imong uyab. Diha na nimo masuta, malain ba siya o mopalayo ba.

Kun pananglit dili mouyon, klaroha dayon nganong dili puwede nga higala ra man kaha mo. Pero wa sab nimo giklaro kun ganahan ba sab ka niya. Mora’g gusto lang ka’g katin-awan. Unya’g motin-aw ang lubog nga tubig, andam ka molangoy? Basin naglibog lang ka unsa ka niya apan dili ka andam sa unsa may plano niya. Klaroha siya, klaroha sad imong kaugalingon. Kun unsa man iyang mga pulong, paminawa lang apan paniid sa iyang reaksyon sa tanan nimo nga pangutana. Diha nimo makita kun nagsumpaki ba iyang pulong sa iyang nawong, labi na sa iyang mga mata.

Apan labaw sa tanan, iyang lihok ang patubagon. Kun makauyab na ka, mag-unsa man siya? Karon nga kahibalo siya nga duna kay plano manguyab og lain, dili ba siya malain? O iya na lang ba angkonon ang dugay na niya gilimod aron di lang ka maadto sa lain. Tito Miguel

Magpatambag ka? Ipada kang Tito Miguel: 0991-318-9366