BOC-Cebu chief inireklamo sa Ombudsman

MANILA, Philippines — Dahil sa alegasyon ng iregularidad sa gawaan ng sigarilyo sa Mactan Export Processing Zone (MEPZ) ay inireklamo ng kasong kriminal at administratibo sa Office of the Ombudsman si Bureau of Customs-Port of Cebu District Collector Alexandra Yap-Lumontad.

Natanggap ng Office of the Ombudsman ang reklamo noong Abril 29 kung saan kabilang sa mga isinampang reklamo laban kay Lumontad ay may kaugnayan sa falsified o forged official seals o stamps on clearance documents at falsification ng commercial documents.

Maaari ring managot ang opisyal sa kasong paglabag sa Republic Act 10863 o Customs Modernization and Tariff Act (CMTA) Sections 1401 (unlawful importation or exportation) at 1424 (export misdeclaration).

Nahaharap din ang opisyal sa kasong administratibo at paglabag sa Republic Act 3019 o Anti-Graft and Corrupt Practices Act at Republic Act 6713 o Code of Conduct and Ethical Standards for Public Officials).

Inirekomenda sa reklamo na magsagawa ng preliminary investigation laban sa kaso para matukoy ang pagkakasangkot ng District Collector.

Hiniling din ng mga stakeholder mula sa BOC Cebu na patawan ng preventive suspension si Lumontad para hindi maapektuhan ang imbestigasyon.

Si Lumontad ay nailipat sa Port of Cebu noong November 2025 matapos iutos ni BOC Commissioner Ariel Nepomuceno ang balasahan sa kanilang mga tauhan bilang bahagi ng kampanya laban sa smuggling at korapsyon sa ahensya.