Knicks andam mobawos sa Spurs

CEBU, Philippines — Ang New York Knicks miduwa sa usa ka NBA Finals didto sa ilang korte sa unang higayon sukad niadtong 1999.

Apan imbes magselebrar, kagul-anan ang mihabol sa Knicks ug sa bagang panon sa ilang fans apil na si US President Donald Trump human sila gipayaka sa San Antonio Spurs, 115-111, sa Game 3 sa ilang best-of-seven series niadtong Martes, Hunyo 9, didto sa Madison Square Garden sa gibansagan nga Big Apple.

Nadoble ang pagkadisyama sa Knicks gumikan kay naputol man ang 13 ka sagunson nilang daog sa playoffs, nga maoy ikaduhang labing taas sa kasaysayan sa liga.

Abante pa hinoon gihapon ang Knicks sa serye sa baraha nga 2-1.

Ang Knicks buot nga moinat sa ilang labaw sa Game 4 nga gikatakada sa alas 8:30 sa buntag karong adlawa (Huybes, Hunyo 12) didto gihapon sa ilang tugkaran.

Si Jalen Brunson nagkanayon nga nakat-on sila og leksiyon gikan sa ilang kapildihan ug andam silang mobawos aron dili na mausab nga mauwawan sila atubangan sa liboan nila ka mga dumadapig.

"We need to be ready to go. Very vague thing to say. I think it's very simple as well. Just need to be ready," matud pa sa alas sa Knicks.

"Win, we learn. Lose, we learn. We understand what we have to do to be better - giving our team a chance to have the ball and not turn it over. Stop fouling. Just attention to detail, continue to be who we are," dugang pa ni Brunson.

Sa iyang bahin, si Knicks coach Mike Brown naglantaw sa unahan ngadto sa laing pisikal nga kumbati batok sa Spurs.

Si Brown masaligon nga mapanindot pa nila ang ilang duwa ug nagpanikad silang ipakita kini uban ang tinguha nga hatagan og daog ang ilang mga fans didto sa ilang balwarti.

Ang Knicks naglaraw nga mabisbisan ang 53 ka tuig nilang huwaw sa titulo. Katapusan silang nakampiyon niadto pang 1973.

Samtang ang Spurs nagtinguha nga mosakmit sa una nilang korona sukad niadtong 2014.