Menor, Senior sikop sa drugbust

CEBU, Philippines — Usa ka 17-anyos ug usa ka senior citizen ang nangadakpan sa duha ka managlahing buybust operations sa mga otoridad sa Cebu City ug sa Mandaue City.

Nasakmitan og 75 gramos nga gidudahang shabu nga nagkantidad og P510,000 atol sa buy-bust operation sa Barangay Guadalupe niadtong Domingo sa gabii, Hunyo 7 ang 17-anyos nga lalaki diha sa Sitio Tabay sa Barangay Guadalupe.

Ang operasyon gihimo sa mga sakop sa Philippine Drug Enforcement Agency sa Central Visayas (PDEA-7) ug mga personnel sa Guadalupe Police Station sa Cebu City Police Office.

Sumala sa mga otoridad, tulo ka paketeng gidudahang shabu ang nakuha gikan sa suspetsado nga gibanabanang kantidad nga P510,000.

Nasakmit usab sa operasyon ang marked money nga gigamit sa transaksyon, usa ka cellphone, ug uban pang ebidensya nga mahimong gamiton sa kaso.

Matud sa PDEA-7, giingong nibaligya og ilegal nga droga ang menor de edad ngadto sa usa ka undercover operative atol sa buy-bust operation.   Human sa pagdakop pa nila nasuta nga menor de edad pa diay ang suspetsado.

Ang bata gi-turnover sa Cebu City Social Welfare and Development Office (CSWDO) alang sa assessment kung nakasabut ba siya sa iyang gibuhat. Ang korte ang mopuno sa final nga desisyon bahin sa iyang discernment.

Giimbestigahan usab sa PDEA-7 kun kinsa ang mga hamtong nga kakunsabo sa menor de edad sa ilegal nga drug trade.

Samtang nadakpan sab ang usa ka 62-anyos nga high-value individual (HVI) sa buy-bust operation nga gihimo sa mga otoridad sa Barangay Subangdaku, Mandaue City.

Ang suspetsado, nga giila lamang sa alyas nga “Bossing,” residente sa Back Matimco, Barangay Subangdaku, nadakpan niadtong Hunyo 6, 2026, alas 6:06 sa gabii sa Mantawe Drive.

Ang operasyon gihimo sa mga operatiba sa City Intelligence Unit (CIU) ug City Drug Enforcement Unit (CDEU) sa Mandaue City Police Office (MCPO) uban sa koordinasyon sa Philippine Drug Enforcement Agency (PDEA). Sa pakighinabi kang MCPO City Director Police Colonel Cirilo Acosta Jr., iyang giingon nga nakumpiska sa operasyon ang 10 ka sachet sa gituohang shabu nga adunay kinatibuk-ang gibug-aton nga 50 gramos ug adunay Standard Drug Price (SDP) nga mokabat og P340,000.

Matud pa ni Acosta, sa ilang dugang imbestigasyon, nasayran nga nadakpan usab si Bossing kapin 20 ka tuig na ang milabay tungod sa kalapasan sa Section 11 sa Republic Act No. 9165 o ang Comprehensive Dangerous Drugs Act of 2002, diin napriso siya.—  reports nilang Mia Esplaguera ug Paul Benedict Soriana, CNU interns/IBM BANAT NEWS