CIPMMS gilusad kagahapon sa Kapitolyo

CEBU, Philippines — Aron mas mapalig-on ang transparency ug hustong pagdumala, pormal nga gilusad sa kagamhanan sa Lalawigan sa Sugbo kagahapon ang Cebu Infrastructure Project Management Monitoring System (CIPMMS) nga magtugot sa publiko nga makakita sa dagan sa proyekto sa tibuok Probinsiya sa Sugbo.

Pinaagi sa bag-ong online portal, makita na sa publiko ang dagan sa status sa mga proyekto nga giimplementar sa Probinsiya sa Sugbo.

Nasayran nga aduna kini dashboard diin makita ang nagkadaiyang katergoriya sa mga proyekto lakip niini ang imprastraktukra sa transportasyon, health care, agrikultura ug turismo.

Matud ni Elizar Sabinay, Jr., executive assistant V nga nakadestino sa Provincial Planning and Development Office (PPDO) nga ang sestema anaa pa sa unang version ug magpadayon sa paglambo ug pag-adjust base sa feedback sa publiko.

Ug ang System Improvement Officers (SIO) responsable sa mga datos diin nipaubos sila sa training sa wala pa gilusad ang sestema ug nagpadayon og training aron masiguro nga husto ang mga impormasyon nga masulod niini.

Ang CIPMMS kabahin sa tinguha sa gobernador nga mapalambo ang kalidad sa serbisyo ug maghatagan og mas tarong nga serbisyo alang sa publiko. —Andriya Valerie Y. Villarino (BANAT NEWS)