Kapitolyo niumol og TWG alang sa 93-1 lots
CEBU, Philippines — Si Gobernador Pamela Baricuatro niluwat sa Executive Order No. 32 Series of 2026 alang sa pag-umol sa Technical Working Group nga mohatag og legal, teknikal ug polisiya nga suporta ngadto sa provincial task force nga nagkupot sa kontrebersiya sa 93-1 lots ug uban pa’ng mga luna sa probinsiya.
Base sa post sa Public Information Office (PIO) sa Kapitolyo nga ang maong EO giluwatan ni Baricuatro niadtong Mayo 25, 2026.
Gipadayag ni Baricuatro nga gumikan sa nagkakomplikado nga dagan sa pagpanag-iya sa luna, urban planning ug socialized housing nagkinahanglan og grupo nga motabang pagtuon niini. Gikataho nga ang TWG magtrabaho ubos sa Task Force on the 93-1 Lots and Other Provincial Occupied Lots nga una na’ng naumol pinaagi sa EO No. 4, Series of 2025.
Pangulohan ang TWG ni Provincial Legal Officer, Atty. Guiler Ceniza isip chairperson ug investments and promotion officer ug Paulo Uy isip co-chairperson.
Gitasahan ang TWG sa pagpahigayon og mga legal, teknikal, ug pagtuon sa mga polisiya, pag usa sa mga land records, pakigtigom sa stakeholders, ug paghimo og mga rekomendasyon alang sa legislative ug administrative nga aksyon nga tun-an sa task force ug sa buhatan sa gobernador.
Gilaoman usab nga pinaagi sa pagtukod sa TWG mas mapalig-on ang tinguha sa kagamhanan sa lalawigan nga makakita og solusyon sa dugay na nga isyu sa 93-1 lots ug uban pa’ng gipanag-iya sa probinsiya. — Andriya Valerie Y. Villarino (BANAT NEWS)
- Latest
