Balik Eskwela malinawon

CEBU, Philippines — Malampuson ug malinawon ang pag-abli sa klase sa School Year 2026-2027 niadtong Hunyo 8, 2026, human walay natala nga krimen sa Cebu City ug Cebu Province, matod sa kapulisan.

Ang Cebu City Police Office (CCPO) nagpatuman og heightened security operations ubos sa Balik Eskwela 2026 aron masiguro ang kaluwasan sa mga estudyante, mga magtutudlo, ug school personnel.

Kapin sa 100 ka pulis ang gi-deploy sa mga eskwelahan, dagkong dalan, pedestrian crossings, transport terminals, ug uban pang critical areas aron mopadayon ang police visibility ug mohatag og tabang sa trapiko ug seguridad.

Gisulti sa CCPO nga ang maong deployment kabahin sa coordinated security plan uban sa Cebu City Transportation Office (CCTO), mga barangay, ug uban pang ahensya sa gobyerno aron mapadayon ang hapsay ug luwas nga pagbukas sa klase.

Gisuportahan usab kini sa mga force multipliers, traffic enforcers, ug volunteers nga nagtabang sa pagdumala sa trapiko ug pagmonitor sa mga eskwelahan.

Samtang sa Cebu Province, gitaho sa Cebu Police Provincial Office (CPPO) nga zero crime incidents ang natala sa unang adlaw sa klase sa tibuok lalawigan.

Sumala sa CPPO, resulta kini sa hugot nga koordinasyon sa mga local government units, mga eskwelahan, barangay officials, ug community partners sa pagpatuman sa security measures sa Balik Eskwela 2026.

Gikan sa sayong kabuntagon, nagpadayon ang presensya sa kapulisan sa mga school zones, nagtabang sa mga estudyante ug ginikanan, nagdumala sa trapiko, ug nagseguro sa kahapsay sa pag-abli sa klase.

Gihimo usab ang police assistance desks sa pipila ka lugar aron dali matubag ang mga panginahanglan sa publiko.

Sa Mandaue City, sumala pa ni Department of Education (DepEd) Division Legal Counsel Atty. Marinel D. Oro malampusong nangabli ag klase kagahapon.

Sa Mandaue City Central School, adunay 3,800 ka estudyante nga nagparehistro atol sa early registration. Apan, sa pagkakaron, 2,838 pa lamang ang nakumpirmang naka-enroll.

Bisan pa niini, abli gihapon ang enrollment alang sa mga estudyanteng wala pa makapalista sukad sa pagsugod niini niadtong Hunyo 1.

Si Police Colonel  Abubakar Udang Mangelen Jr., Provincial Director sa CPPO, miingon nga ang malinawon nga pagbukas sa klase resulta sa maayong preparasyon ug suporta sa komunidad.

Gidayeg usab ni PBGEN Arnold Evangelista Abad, Regional Director sa PRO7, ang kapulisan ug mga kaabag tungod sa ilang dedikasyon sa pagsiguro sa kaluwasan sa mga estudyante.

Sa bahin sa lokal nga kagamhanan, gipasalamatan ni Governor Pamela S. Baricuatro ang koordinasyon ug paningkamot sa mga ahensya sa gobyerno, eskwelahan, ug mga boluntaryo nga nakatabang sa luwas nga pagbalik sa klase.

Giingon sa CPPO nga magpadayon ang security operations sa tibuok school year pinaagi sa police visibility, patrol operations, traffic management, ug close coordination sa mga eskwelahan ug LGUs aron mapadayon ang kalinaw ug seguridad sa mga estudyante.— Cheny Labrado, Mia Esplagera (BANAT NEWS)