Material Recovery Facility gilusad diha sa SRP

CEBU, Philippines — Gilusad ang Materials Recovery Facility sa bag-ong natukod nga Eco Station sa South Road Properties aron palig-unon ang Waste Management sa Dakbayan sa Sugbo atol sa pagsaulog sa World Environment Day niadtong Hunyo 6, 2026.

Ang maong kalihukan kabahin sa padayon nga paningkamot sa syudad nga mapalig-on ang ecological solid waste management ug masolusyonan ang nagpadayong problema sa basura.

Gitambugan ang maong kalihukan sa mga representante gikan sa mga ahensya sa gobyerno, mga organisasyon sa civil society, mga institusyong akademiko, mga interfaith group, mga barangay, ug mga sakop sa pribadong sektor nga nagpakita sa ilang suporta sa mga programa alang sa kalikupan.

Atol sa programa, gihatagan og orientation ang mga partisipante sa Department of the Interior and Local Government (DILG), Environmental Management Bureau (EMB), ug Cebu Archdiocesan Commission on Environmental Concerns (CACEC) bahin sa kamahinungdanon sa hiniusang aksyon aron masulbad ang nagkadakong hagit sa solid waste management.

Sa iyang mensahe, gipasabot ni Cebu City Mayor Nestor Archival ang kritikal nga papel sa mga komunidad, institusyon, ug negosyo sa pagpalambo sa responsableng pag-atiman sa kalikupan ug sa pagkab-ot sa malungtarong kalamboan.

Gipaila usab sa syudad ang Eco Station-SRP, nga gitumong nga mahimong sentro sa environmental education, recycling, composting, ug resource recovery.

Pinaagi sa MRF, ang mga recyclable materials mahimong kolektahon ug mapalit sa mga obligated enterprises ug accredited recyclable buyers, nga maghatag og oportunidad sa pagbag-o sa basura ngadto sa mga mapuslanong kahinguhaan.

Kabahin sa paglusad ang personal nga paglibot ni Mayor Archival sa mga pasilidad sa Eco Station diin iyang nasaksihan ang mga demonstrasyon sa hustong waste segregation, composting, recycling, ug upcycling.

Gibendisyunan usab ni Archbishop Alberto Uy ang mga importanteng pasilidad sulod sa Eco Station, lakip na ang mga recycling tents, lounge alang sa mga drayber ug loader sa garbage trucks, composting ug compost bottle-making demonstration area, ug upcycling area alang sa mga materyales nga bildo ug plastik. — MEL  BANAT NEWS