Paghatag og prangkisa sa CEBECO I giaprobahan

CEBU, Philippines — Giaprobahan sa House Committee on Legislative Franchises ang usa ka consolidated substitute bill nga naghatag og prangkisa sa Cebu Electric Cooperative, Inc. (CEBECO I)

Kini atol sa hearing niini niadtong Hunyo 3, 2026 diin giaprobahan ang lakang nga nagkonsolida sa House Bill Nos. 5898 ug 6431.

Ang House Bill No. 5898, nga gisulat ni Malasakit at Bayanihan Congresswoman Girlie Veloso uban nila ni Representatives Sergio C. Dagooc ug Presley C. De Jesus, nagtumong sa paghatag og prangkisa sa CEBECO I aron makatukod, makainstalar, makapalig-on, makapaandar, makapanag-iya, makadumala ug makamintinar sa mga distribution system alang sa pagdala ug pag-apod-apod sa elektrisidad sa Dakbayan sa Carcar ug sa mga lungsod nga sakop sa serbisyo niini sa habagatang bahin sa Sugbo.

Atol sa hearing, gipadayag ni Congresswoman Veloso ang iyang suporta sa maong lakang, ug gihatagan og gibug-aton ang kamahinungdanon sa kasaligan nga suplay sa elektrisidad aron mapadayon ang kalamboan sa mga komunidad.

Gihisgutan usab sa kongresista ang dugay nang koneksiyon sa iyang pamilya sa adbokasiya alang sa rural electrification sa Sugbo pinaagi sa iyang uyoan nga si Fr. Paking Silva, nga naghalad sa dakong bahin sa iyang kinabuhi sa pagpalapad sa akses sa elektrisidad ug pagpalig-on sa mga institusyon nga nagdala og kuryente ngadto sa mga komunidad sa tibuok probinsiya.

“Perhaps that is why I have always viewed CEBECO I as more than a utility. It is a community institution that has helped improve lives across generations of Cebuanos,” dugang pa ni Veloso.

Atol sa deliberasyon, usa ka opisyal sa National Electrification Administration (NEA) ang mipahibalo sa Komite nga ang CEBECO nakab-ot ang hingpit nga marka sa tanang evaluation metrics ubos sa assessment system sa ahensiya.

Gipasalamatan usab ni Veloso ang mga kontribusyon ni CEBECO I General Manager Engr. Loy Crodua, sa Board of Directors, mga opisyal, empleyado ug sa liboan ka member-consumer-owners kansang padayon nga dedikasyon maoy nakapadayon sa misyon sa kooperatiba sa paghatag og episyente, kasaligan ug dali maabot nga serbisyo sa elektrisidad ngadto sa mga komunidad nga ilang gisilbihan.

Human sa deliberasyon, giaprobahan sa Komite ang consolidated substitute bill nga naglangkob sa House Bill Nos. 5898 ug 6431, ingon man ang katugbang nga committee report niini, nga nagbukas sa dalan alang sa dugang nga pagtagad ug konsiderasyon sa House of Representatives. MEL BANAT NEWS