El Niño gipangandaman sa siyudad sa sugbo

CEBU, Philippines — Nangandam na ang Cebu City Disaster Risk Reduction and Management Office (CCDRRMO) ug ang Department of Social Welfare Services (DSWS) sa pagtipig og pagkaon, relief supplies, ug mga materyales sa konstruksyon alang sa umaabot nga bagyo ug panahon sa El Niño.

Tumong niini mao ang masiguro nga paspas ang paghatag og tabang sa mga pamilya ug mga residente sa syudad nga labing maapektuhan kung adunay kalamidad.

Gitan-aw nga maapektuhan ang syudad sa posibleng grabeng kadaot sa El Niño karong tuiga diin matud pa sa Philippine Atmospheric, Geophysical and Astronomical Services Administration (PAGASA) nga posible kining mosamot ug mahimong “Super El Niño” sa ulahing bahin sa 2026 o sayong bahin sa 2027.

Ang konseho sa dakbayan nideklarar og state of preparedness niadtong Abril aron mapalig-on og pagmonitor, ug pagpatuman sa mga preventive ug adaptive nga mga lakang aron mamenosan ang epekto sa grabeng kainit ug posibleng mga kahimtang sa huwaw.

Gisiguro usab sa siyudad ang igo nga gidaghanon sa disaster family kits nga adunay mga gamit sa kusina, personal nga hygiene kits, mga sinina, ug magamit sa pangkatulog.

Samtang gipangandaman karon sa Mandaue City ang usa ka dako’ng dredging project sa Butuanon River nga gilauman makatabang pagpakunhod sa pagbaha sa siyudad ilabina karong nagsugod na ang ting-uwan.

Matud ni City Administrator Atty. Gonzalo “Sally” Malig-on Jr., usa ka pribadong kompaniya inubanan sa Department of Public Works and Highways (DPWH) ang andam nga mopatuman sa dredging operation isip kabahin sa ilang Corporate Social Responsibility (CSR) program ug walay gasto alang sa city government.

Si Mandaue City Mayor Thadeo Jovito “Jonkie” Ouano maoy mopahibalo sa dugang detalye sa proyekto sa higayon nga mahuman na ang panaghisgot ug andam na kini sugdan. Sumala ni Malig-on, usa sa mga hinungdan sa pag-awas sa suba panahon sa kusog nga ulan mao ang siltation o ang pagtapok sa lapok ug ubang sediment sa ilawom sa suba.

“Dako na og ikatabang kay kahibaw naman ta usa gyud sa makaproblema nga mu-overflow kana man gyung siltation,” matud niya.

Matud pa ni Malig-on, nahimo na usab ang mga koordinasyon uban sa mga barangay ug ubang sektor aron matubag ang mga isyu sa trapiko, operasyon, ug mga lugar nga pagabutangan sa mga kagamitan sa proyekto. Kristin De Dios/MEL BANAT NEWS