Career o uyab?

Dear Tito Miguel,

Ako diay si Jasmine,  25 anyos nga, taga Barangay T. Padilla, Cebu City. Naa ko’y uyab, siya si Dave. Hapit na mi magtulo ka tuig. Kanunay mi magkuyog sauna ug daghan mi og panahon para sa usa’g usa.

Apan sukad nga nagkadako ang iyang mga proyekto isip usa ka arkitekto, mura’g nausab na ang tanan. Mas daghan na siya og  oras nga gigahin sa iyang trabaho kaysa sa among relasyon. Kung magkita man mi, kasagaran kapoy na siya ug trabaho ang iyang gihunahuna.

Nasabtan man nako nga importante ang iyang career ug gusto nako siyang suportahan sa iyang mga damgo. Apan usahay, mabati nako nga dili na ko prayoridad  sa iyang kinabuhi. Murag naa na lang ko sa kilid samtang ang iyang trabaho maoy naa sa sentro sa iyang atensyon.

Sa dihang gisultihan nako siya sa akong gibati, iyang tubag nga naningkamot lang siya alang sa among kaugmaon ug kinahanglan ko kuno nga masabtan ang iyang sitwasyon. Nasabtan nako ang iyang punto, apan dili usab nako malikayan nga masakitan tungod kay bisan gamay nga panahon para kanako, mura’g lisod na kaayo niya nga mahatag. Unsa ang angayan nakong buhaton?

Daghang salamat. -Jasmine-

* * *

Jasmine,

Paniid lang sa. Kun hasta sa iya’ng pamilya ug mga higala wala siya’y panahon, trabaho lang gyud ang rason. Pero’g kanimo wala’y oras apan sa uban duna ug dili pa gyud ka kuyogon, angay na ka magduha duha.

Ka’y ang tawo nga tiunay kanimo, dili ka pasagdan maski unsa na ka busy. Kun pananglit wala siya’y panahon magkita mo, at least man lang ang video call o chat ,sustinido aron padayon mo nga konektado.

Pero kun hasta pangumusta sa text wala na, lagmit sakto ka, dili na ikaw iyang prayoridad. Simple ra man gud na, maski unsa siya ka busy, mangita gyud na’g paagi magkita mo tungod sa kamingaw. Pero’g dili na magparamdam, basin nagpaabot na lang siya nga ikaw na ang makasabot. Labi na gyud kun naa diay siya’y free time apan tua sa uban gipahimuslan.

Apan balikon ko, paniid lang usa. Wa ka kahibawo duna siya’y sorpresa kanimo. Basin tinuod iyang ingon nga focus lang siya sa trabaho. Pasagdi lang sa, suportahi lang sa. Arang arang na lang na kaysa sa laing babaye siya busy.

Busa paabot lang, hangtud kanus-a, ikaw ra ang makahukom. Apan paniid sa iyang mga lihok, labi na sa wala buhata, kay lagmit ang tubag dugay na nimo nakit-an, wala lang nimo mailhan.    

-Tito Miguel-

Magpatambag ka? Ipada kang Tito Miguel: 0991-318-9366