18 balay naugdaw

CEBU, Philippines —  Gibana-banang 28 ka pamilya  ang  nawad-an og panimalay human naapektuhan sa sunog sa usa ka residential area sa Sitio  Crosan, Barangay Bulacao, Talisay City, Sabado sa buntag, Hunyo 6, 2026.

Sa initial nga assesment sa Department of Social Welfare and Development (DSWD) of Talisay City, nasayran nga 18 ka panimalay ang totally damaged, samtang gibana-banang 28 ka pamilya o 118 ka mga indibidwal ang naapektuhan sa maong sunog nga nahitabo sa  residential area nga kasagarang hinimo sa light materials.

Ang lugar nga nasunog gibana-banang 250 square meters ang gilapdon ug naapektuhan ang kapin o kulang sa 28  ka pamilya.  Matod sa Talisay City Fire Station (FS), ang insidente nadawat nila sa alas 10:31 sa buntag pinaagi ni FO1 Ellaine Diki.  Miresponde dayon ang mga bombero ug miabot sa dapit sulod sa tulo ka minuto, diin giisa dayon ang unang alarma sa alas 10:34 sa buntag.

Tungod kay kasagaran sa mga balay ginama sa light materials, daling mikatap ang kalayo hinungdan nga giisa kini sa ikaduhang alarma sa alas 10:43 sa buntag.  Nadeklarar nga kontrolado na ang kalayo sa alas 10:56 sa buntag, suma pa sa opisyal nga report.

Human sa hapit usa ka oras nga operasyon sa pagpalong sa kayo, nideklarar ang Talisay City FS nga hingpit nang napalong ang sunog sa alas 11:03 sa buntag.  Si FO2 Mar Dee Auxtero, Fire Investigator sa Talisay City FS, Lawaan II, giingon nga nagsugod ang sunog sa balay nga gipanag-iya ni Felix Basillote Sr.

Sa pakighinabi ni FO2 Auxtero sa anak sa tag-iya sa balay nga si Felix  Basillote Jr., giingong nakakita na kini og mga sparks sa linya sa kuryente ibabaw sa ilang balay sa wala pa nahitabo ang insidente.

Dugang pa ni FO2 Auxtero,  ang sunog nagbilin og gibana-banang P375,000 nga danyos, samtang walay na-report nga casualty o naangol sa insidente.  Sa pagkakaron, ang mga biktima temporaryong gipapuyo sa Bulacao Sports Activity Center samtang nagpadayon ang lawom nga imbestigasyon sa kabomberohan sa tinuod nga hinungdan sa sunog.