Libreng pag-opera sa mata gilusad sa siyudad sa Sugbo
CEBU Philippines — Gilusad sa Cebu City Government ang “Gift of Sight: Libre nga Cataract Surgical Charity Event,” alang sa mga residente sa Dakbayan sa Sugbo nga dunay problema sa panan-aw tungod sa katarata.
Kini pinaagi sa pagtambayayong sa Office of the Mayor ug City Hospitalization Assistance and Medicines Program (CHAMP), niadtong Hunyo 5, 2026. Gihimo ang Grand Assessment Day sa Social Hall Legislative Building sa Cebu City Hall diin gisusi una sa mga espesyalista ang kahimtang sa mata sa mga partisipante aron makita kung kwalipikado sila sa operasyon.
Makadawat og libre nga cataract surgery, intraocular lens, tambal, ug uban pang medikal nga suplay ang mga kwalipikadong benepisyaryo gikan sa maong programa.
Matod ni Raychie Lomongo CHAMP Executive Director, ang maong programa resulta sa kolaborasyon sa gobyerno ug pribadong mga organisasyon aron mapalapdan ang serbisyong medikal alang sa mga Sugboanon.
Kauban sa maong kalihokan ang Mabuhay Deseret Foundation, ACES Eye Clinics, Charity Vision, ug ang Church of Jesus Christ of Latter-day Saints nga naghatag og suporta sa mga lente, tambal ug uban pang kinahanglanon sa operasyon.
Matud ni Lomongo, sa miaging programa niadtong 2025 nga gitawag og Project 100, gilimitahan nila sa 100 ang gidaghanon sa mga partisipante. Bisan pa niini, adunay 189 ka mga aplikante nga miapil ug 67 kanila ang malampusong naoperahan human makapasar sa mga pagsusi ug kwalipikasyon.
Samtang karon wala na magbutang og limitasyon sa gidaghanon sa mga aplikante tungod kay modagan ang programa gikan Hunyo hangtod Disyembre 2026.
Si Marites Lomocso, 64, residente sa barangay Tejero ug partisipante sa maong programa, nagkanayon nga mapasalamaton siya kay adunay libre nga medical eye check-up ilabi na sa parehas niya nga hanap og mata tungod sa katiguwangon.
Dugang pa, sa maong programa dunay libreng assessment alang sa mga nanginahanglan og prosthesis o artipisyal nga paa ug bukton alang sa mga amputee tungod sa sakit o aksidente. (BANAT NEWS)
- Latest
