2 traffic enforcer itinumba ng tandem!
COTABATO CITY, Philippines — Agad namatay sa mga tama ng bala ang dalawang kilalang municipal traffic enforcers na kasalukuyang naka-duty at nagmamando ng trapiko nang pagbabarilin ng riding-in-tandem sa Barangay Campo Muslim, Malabang, Lanao del Sur nitong Huwebes.
Sa ulat ng mga local executives at ni Capt. Steffie Salanguit, spokesperson ng Police Regional Office-Bangsamoro Autonomous Region, parehong on-duty ang dalawang traffic enforcer na sina Samar Marohom at Jamael Talib sa isang bahagi ng highway sa Barangay Campo Muslim nang may lumapit sa kanilang dalawang lalaking magkaangkas sa motorsiklo at agad silang pinagbabaril ng .45 at 9 millimeter pistols.
Parehong na-idineklarang dead-on-arrival sina Marohom at Talib ng mga attending physicians sa Doctor Serapio Montañer Hospital sa Malabang kung saan sila dinala ng mga pulis at barangay officials upang malapatan sana ng lunas.
Ayon kay Salanguit at ng Lanao del Sur Provincial Police Office, may teorya na may kaugnayan sa mahigpit at masigasig na pagpapatupad ang dalawang biktima ng mga traffic ordinances sa kanilang bayan ang pagpaslang sa kanila.
Mabilis na nakatakas ang mga pumatay sa dalawang biktima gamit ang kanilang motorsiklong walang plaka, ayon kay Salanguit.
Nagtutulungan na ang mga local executives, Maranao community leaders at ang police investigators ng Malabang Municipal Police Station sa pagkilala sa mga pumatay kina Marohom at Talib upang masampahan ng kaukulang mga kaso.
- Latest
