Oplan Pakigsandurot mas gipalig-on

CEBU, Philippines — Malampusong gipahigayon ang Oplan Pakigsandurot Capacity Building diin gitutokan ang pagpalig-on sa kaandam sa emerhensiya, kahibalo sa kaluwasan sa publiko, ug kapasidad sa pagresponde sa mga kalamidad ug insidente sa komunidad, ngadto sa Executive Building Cebu City Hall, niadtong Hunyo 3, 2026.

Gitambongan ang maong kalihokan sa mga barangay captain, barangay tanod, ug ubang personnel sa komunidad aron sa pagpalambo sa ilang kahibalo ug kahanas sa pag-atubang sa nagkalain-laing emerhensiya nga mga panghitabo sa ilang lugar.

Sa nag-unang bahin sa kalihokan gipahigayon ang Emergency Readiness and Basic Life Support Training sa Cebu City Disaster Risk Reduction and Management Office (CCDRRMO) diin si  Administrative Assistant Rolito Gerald Flordelis maoy resource speaker nga mitudlo sa mga partisipante sa hustong pamaagi sa pagresponde sa emerhensiya sitwasyon ug paghatag og unang tabang sa mga nanginahanglan.

Gitudlo usab ang kabahin sa Bomb Threat ug Bomb Identification, diin ang mga partisipante gitudloan sa pag-ila sa posibleng hulga sa seguridad niini ug sa hustong proseso sa pagresponde sa sitwasyon nga nagkinahanglan og paspas nga tabang.

Dugang pa, nagpakita og demonstrasyon ang mga miyembro sa Cebu City Special Weapons and Tactics (SWAT) Team bahin sa Proper Handcuffing and Restraint Techniques, aron mapalambo ang kahibalo sa mga partisipante sa sakto ug responsableng pamaagi sa pagdumala sa sitwasyon nga nagkinahanglan og restraining procedures.

Mitambong sa maong kalihokan si Vice Mayor Tommy Osmeña diin sa iyang mensahe iyang giawhag ang mga partisipante nga gamiton ang ilang mga nakat-onan gikan sa maong kalihokan aron mapalig-on pa ang giandamon ug kalig-on sa ilang komunidad gikan sa emerhensiya ug kalamidad.

Mipadayag usab og suporta sa maong kalihokan ang mga representante sa nagkalain-laing ahensya sa gobyerno,  lakip niini si PLTCOL Miguel Andeza Deputy City Director for Operations, Police Major Marvin Fegarido, Officer-in-Charge sa City Community Affairs Development Unit, ug si DILG Cebu City Director Jonah V. Pino, MPA, CESO V.

Alang sa kalampusan sa maong kalihokan nihatag og panapos nga pamulong si Konsehal Paul Labra og mipasalamat sa mga organisador ug gihatagan og sertipiko ang mga partisipante isip pag-ila sa ilang malampusong pagtuman sa training sessions. — Rachel E. Wenceslao CNU-Main Intern/IBM BANAT NEWS