Visa consultancy, language training center gipasirado sa DMW

CEBU, Philippines — Gisirado kagahapon sa Department of Migrant Workers (DMW) ang usa ka visa consultancy firm diha sa Mabolo, Dakbayan sa Sugbo ug ang usa ka language training center sa Barangay Bakilid, Dakbayan sa Mandaue tungod sa alegasyon nga wala kini lisensiya sa pakiglambigit og recruitment ug pagpangsaad og garantisadong trabaho ngadto sa abroad.

Ang nahisgotang mga establisamento nga gisirado mao ang Anaya US Visa Consultancy Inc. ug JLPT/JFT Training and Assessment Center.

Matud sa DMW nga ang duha ka establisamento giingong nagpatigayon og recruitment ug placement activities alang sa overseas employment bisan wala kini lisensiya.

Bisan pa nga lehitimong visa consultancy ang Anaya US Visa Consultancy Inc., nalambigit kini sa ilegal nga recruitment pinaagi sa pagpangsaad og mga trabaho ngadto sa Amerika ug Finland ubos sa H-2A ug H-2B visa programs bisan wala sila’y recruitment license.

Giingong naningil usab kini og processing ug placement fees nga nikabat gikan sa P150,000 hangtud sa P300,000 alang sa dokumentasyon, visa processing ug deployment assistance.

Ang surveillance operation nga gihimo sa ilang mga operatiba,lakip na ang mga undercover personnel nga nagpakaaron-ingnong aplikante nakadiskubre nga adunay mga trabahante nga gitanyagan og temporaryong trabaho ngadto sa Dubai samtang naghulat sa pag-aproba sa ilang US visa.

Ang closure operation gihimo uban sa mga lokal nga otoridad nagtinguha usab sa pagkansela sa mga permit sa establisamento tungod sa mga paglapas sa balaod.

Ang mga representante sa visa consultancy nagkanayon nga ilang gitahod ug sabton ang aksyon sa gobiyerno.

Sa laing bahin, gisirado usab sa DMW ang JLPT/JFT Training and Assessment Center human sa surveillance operation tungod kay giingong nag-recruit og mga trabahante ubos sa Japanese language training.

Nagsaad kini og garantisadong trabaho ngadto sa abroad ug nagkinahanglan nga mahuman una sa trainees ang ilang language program sa dili pa sila iendorso ngadto sa mga partner recruitment agencies.

Giingong naningil usab kini og processing fees nga gikan sa P50,000 hangtud sa P100,000.

Atol sa closure operation, nakit-an sa mga awtoridad ang unom ka estudyante nga nagtungha sa language center.

 Kadaghanan sa mga estudyante nagpangedaron kini ngadto sa 20-anyo ug giingong ni-enroll sila human makakita og mga anunsiyo diha sa Facebook ug nibayad og tag P22,000 alang sa upat ka buwang Japanese language course uban sa paglaom nga makatrabaho ngadto sa abroad. — Mia D. Esplaguera, CNU-Journalism intern, BDB BANAT NEWS