Cebu namawi, gilampaso ang Valenzuela sa MPBL

CEBU, Philippines — Ang Cebu Greats impresibong namawi sa miagi nilang kapildihan uban ang 89-70 nga paglampornas sa Valenzuela City Darkhorse, 89-70, alang sa ikawalo nilang daog sa  Maharlika Pilipinas Basketball League (MPBL) Season 8 niadtong Huybes sa gabii, Hunyo 4, didto sa Cuneta Astrodome sa siyudad sa Pasay.

Si Mark Meneses mibulsa og 17 puntos uban ang walo ka rebounds, duha ka assists ug tulo ka steals samntang si Ron Dennison mitali sab og 17 puntos uban ang duha ka rebounds sa dihang ang Cebu dali nga nakabangon gikan sa 80-91 nilang kaparotan sa mga kamot sa Gensan Warriors nga nakaputol sa lima ka sagundon nilang daog sa miaging semana.

Midugang si Wowie Escosio og 14 puntos, walo ka rebounds, usa ka assist ug usa ka steal samtang si Dhon Reverente miamot og 11 ka rebounds ug upat ka assists alang sa Greats, nga nagkupot na karon og 8-3 rekord human midaog sa ikaunom nga higayon sa miagi nilang pito ka duwa.

Ang Cebu alkansi og dos puntos, 17-19, human sa unang kuwarter apan milusad og mainit nga resbak, 23-10, aron pag-establisar og 40-29 nga labaw sa halftime.

Ang Valenzuela katapusang nakasikit sa iskor nga 60-64 sa nakaon nga 44 segundos pa lamang sa katapusang kuwarter gumikan kay ang Cebu mitagak og 13-0 nga bomba aron paburoton og balik ang ilang bentaha ngadto na sa 17 puntos, 77-60, sa pinal nga 6:21 sa duwa.

Ang lima ka sunod-sunod nga puntos ni Dondon Hontiveros sa katapusang 95 seconds maoy nagsilyo sa 19 puntos nga demolisyon sa Cebu sa Darkhorse. Ang way pagbahar nga Cebuano hotshot mitapos uban ang otso puntos, duha ka rebounds, ug usa ka assist.

Sila si Angelo Obuyes ug Jay Collado nagkumbinar og 41 puntos apan dili igo ang ilang kombinasyon gumikan kay ang Valenzuela napukan sa ikatulong higayon sa miagi nilang lima ka duwa ug natagak sa 5-6.