Batch 2003 padayong nagmangtas sa SHAABAA

CEBU, Philippines — Ang Cebu Landmasters Batch 2003 mikulata sa 2K Core Pacific, 72-37, aron pagpabiling way pildi sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Justin Huang mihipos og 15 puntos, piro ka rebounds, duha ka assists ug duha ka steals samtang si Carlo Cecil Alerta midugang og 10 puntos, tulo ka rebounds, pito ka assists ug usa ka steal alang sa Batch 2003, nga miinat sa ilang labaw sa Division A uban ang perpektong 6-0 nga marka.

Si Joseph Lo miposte og double-double nga 14 puntos ug 15 ka rebounds samtang si Benedict Chua milansang sab og 14 puntos uban ang upat ka rebounds ug usa ka assist apan sa way kapuslanan kay ang Core Pacific natagak sa 4-2.

Ang ARQ Batch 2001 nagsolo sa ikaduhang puwesto bitbit ang 4-1 nga baraha human gipakaging ang Big Three Pizza Batch 1996, 68-53.

Si Mark Hing maoy nangu sa Batch 2001 uban ang 20 puntos, unom ka rebounds ug duha ka assists.

Si Jason Arquisola miamot og 12 puntos, unom ka rebounds, duha ka assists, tulo ka steals ug usa ka block samtang si Josef Reoma mitimbre og 12 puntos, upat ka rebounds, duha ka assists ug usa ka steal alang sa Batch 2001m nga wala na molingi pa sukad miabante og 15 puntos, 50-35, human sa tulo ka kuwarter.

Si Andew Po mikadlit og 16 puntos ug 11 ka rebounds samtang si Roderick Mangubat mikolekta og 14 puntos, walo ka rebounds ug upat ka assists apan nakawang ang ilang paningkamot kay ang Batch 1996 nadakin-as ngadto sa 3-3.

Sa Division C, ang defending champion Core+ Batch 2018 miinat sa ilang rekord ngadto sa 6-1 human na-forfeit ang kontra nilang Comforser Tires Batch 2022,samtang ang Batch 2014 mipaksit sa Rufrance LPG Batch 2026, 84-74.

Si Lucky Ecarma mirehistro og double-double nga 29 puntos ug 15 ka rebounds uban ang unom ka assists samtang si Noriko Benedicto midonar og 13 puntos, upat ka rebounds ug usa ka steal sa dihang ang Batch 2014 mikulit sa ikaupat nilang daog sa unom ka duwa.

Sila si Jair Igna ug Arvid Jason Ong dako sab og naambag human nagkumboya'g 21 puntos alang sa Batch 2014.

Si Benj Anthony Chua mihimo og impresyon sa double-double niyang 31 puntos ug 19 ka rebounds nga iyang gisukipan og lima ka assists ug duha ka steals apan wala mosaler ang maanindot niyang salida kay ang Batch 2026 nahagsa sa 3-4.