Pangalan ni Utlang padayong gigamit sa DVMF?

CEBU, Philippines — Gikwestiyon sa kanhi pangulo sa Cebu City Department of Veterinary Medicine and Fisheries (DVMF) Dr. Alice Utlang ang padayon nga paggamit sa iyang ngalan sa mga opisyal nga dokumento sa DVMF bisan nga unom ka bulan na siya nga retirado sa serbisyo.

Sa iyang Facebook post niadtong Hunyo 3, 2026 gipahimangnoan ni Utlang ang mga personnel sa DVMF ug mga deputized meat inspectors human niya nadiskobrehan nga ang mga confiscation o condemnation certificates nga giisyu batok sa mga meat violators sa siyudad nagdala gihapon sa iyang ngalan isip city veterinarian.

Ang maong reaksiyon ni Utlang subay sa Facebook post sa DVMF diin gipakita niini ang operasyon niadtong Mayo 25, 2026 nga nakakompiska og 55 ka kilo nga pork chorizo diha sa Taboan Public Market ug 46 ka kilo nga karne sa manok diha sa Barangay Ermita isip kabahin sa pagpatuman sa mga regulasyon sa food safety ug meat inspection standards.

Gikwestiyon usab ni Utlang ang unod sa usa sa mga confiscation certificate ug ang rason nga gilista alang sa pagkompiska sa mga produktong karne diin gisuwat niini ang pulong nga “Valentino”.

Sa pagpakighinabi ni Utlang sa Banat News matud niini nga dili makiangayon nga padayon nga gigamit ang iyang pangalan sa mga dokumento sa buhatan.

Nitubag si Dr. Jessica Maribojoc, officer-in-charge sa DVMF sa mga alegasyon pinaagi sa komentaryo diha sa Facebook post ni Utlang ug nipasabot nga sukad niadtong Enero 3, 2026 gipahibalo na sa ilang opisina ang recall sa tanang opisyal nga dokumento nga nagdala sa ngalan ni Utlang.

Matud ni Maribojoc nga dili angay nga pasanginlan ang mga personnel nga nagpakitang gilas lang sa ilang trabaho.

Giklaro usab ni Maribojoc nga ang mga sayop o kalainan sa mga opisyal nga dokumento husayon pinaagi sa tukmang administratibong proseso ug dili pinaagi sa social media.

Sa pagkakaron, gitangtang na sa mga Facebook post ang condemnation certificates apan wala tangtanga ang tibuok post aron magpabiling pahimangno ug awareness campaign alang sa mga negosyante sa karne ug mga konsumidor. (BANAT NEWS)