Duterte supporters nipadayag og suporta sa majority senators

CEBU, Philippines — Ang kanhi Mayor sa Cebu City nga si Mike Rama miapil sa usa ka malinawon nga pundok-pundok sa mga supporter ni kanhi presidente Rodrigo Duterte nga gihimo sa Plaza Independencia kagahapon, Hunyo 4, diin iyang gipadayag ang suporta sa mga majority senator nga nagpahigayon sa Senate Blue Ribbon Committee proceedings.

Ang maong panagtigom gitambongan sa mga miyembro sa Cebu Alliance for Duterte, Duterte Riders Team, Save the Philippines–Cebu Chapter, Maisug–Cebu, ug sa Muslim Community for Duterte, apil ang ubang DDS-aligned nga mga grupo.

Nipadayag og kabalaka ang grupo sa bag-ong mga kalamboan sa Senado ug nanawagan og accountability, transparency, ug fairness sa pagdumala sa mga isyu sa nasud.

Si Jun Abines, secretary general sa Cebu Alliance for Duterte, miingon nga ang maong assembly nagpakita sa sentimyento sa mga supporter nga nagbantay pag-ayo sa mga panghitabo sa taas nga kamara.

Miingon si Abines nga ang grupo nanawagan sa mga magbabalaod nga siguruhon nga ang mga proceedings sa Senado magpabilin nga patas ug naka-focus sa interes sa publiko.

Si Moises Deiprarine, founder sa Duterte Team Riders, miingon nga ang maong kalihokan malinawon ug gitumong lamang sa pagpadayag og panaghiusa ug politikal nga baruganan nga wala makasamok sa kahusay sa publiko.

Samtang nanawagan usab si Acting Senate President Pro Tempore Sherwin Gatchalian og panaghiusa sa Senado ug mipasalig sa publiko nga magpadayon ang buluhaton sa lehislatura bisan pa sa nagpadayon nga panaglalis sa liderato sa kamara.

Sa usa ka press conference sa Senado, miingon si Gatchalian nga ang mga magbabalaod kinahanglan magpokus sa mga dinaliang isyu sa nasud, lakip na ang inflation, mga pending nga balaod, ug ang kumpirmasyon sa mga opisyal sa militar.

Miingon usab si Gatchalian nga makig-istorya siya sa mga senador gikan sa mayorya ug minorya aron mapasig-uli ang kalig-on ug kooperasyon sulod sa kamara. Isip acting Senate President, miingon usab si Gatchalian nga aduna siya’y awtoridad sa pagtuman sa tanang katungdanan sa Senate President samtang bakante pa ang maong posisyon.

Samtang gibalik si Senador Bam Aquino isip chairperson sa Senate Committee on Basic Education, Arts and Culture taliwala sa nagpadayon nga tensyon ug kalibog sa liderato sulod sa Senado.

Sa usa ka pahayag, giingon ni Aquino nga positibo niyang nakita ang pagtambong ni Senador Francis “Chiz” Escudero sa sesyon sa Senado, nga matod niya makatabang sa pagpadayon sa normal nga operasyon sa kamara.

Matod niya, naapektuhan sa kasamtangang sitwasyon ang trabaho sa Senado, lakip na ang mga hearing ug pagproseso sa mga committee report.

Bisan pa sa mga panaglalis sulod sa Senado, nag-awhag si Aquino sa iyang mga kauban nga magpadayon sa ilang responsibilidad isip mga magbabalaud. —Kristin De Duos, Sofhia Grace Neri (BANAT NEWS)