Bag-ong single ni Ramona

CEBU, Philippines — Nagpagawas si Andrea Brillantes, pinaagi sa iyang alter ego nga si Ramona, og bag-ong single nga “Laguna” niadtong Mayo 29 nga adunay pop-punk nga tuno. Kini ang labing bag-o niya nga musical offering human nagmalampuson ang iyang debut single nga “Gaga” nga mitungtong na sa ika-60 nga puwesto sa Spotify Viral charts ug nikulit og kapin sa 300,000 ka TikTok creations.

Susama og dagway

Nakisabay si Max Collins sa kasikas online human nabatyagan sa netizens nga susama sila og dagway sa unang Miss Grand International All Stars nga si Vanessa Pulgarin sa Colombia. Sa iyang Facebook post, gitubag ni Max ang mga komento sa netizens pinaagi sa makalingaw nga mensahe nga, “Salamat sa lahat ng bumati,” uban sa tulo ka nagkatawa nga emojis.

Nag-date sa Greece

Gisaulog nila Zeinab Harake ug Ray Parks ang ilang unang anibersaryo sa kaminyoon pinaagi sa pagbakasyon sa Mediterranean Sea, diin nalingaw usab sila sa katahom sa Milos, Greece. Sa ilang Instagram post, nagbilin sila og mensahe nga “3 years together, 1 year married, lifetime to go. Happy anniversary.” —Grezy Mie Sibay, CNU-Main Intern

“The Clash Teens”, nagkadoul na!

Andam na  nga mopasiklab ang 24 ka Teen Clashers nga mosabak sa “The Clash Teens” sugod karong Hunyo 7 nga giila isip usa sa mga dakong  singing competition karong tuiga.

Sa webisodes sa “Behind The Clash,” anam –anam nga gipaila ang  contenders.

Magpadayon usab isip Clash Masters sila Julie Anne San Jose ug Rayver Cruz, samtang magpabilin sa Clash panel si Christian Bautista uban sa bag-ong mga hurado nga sila Jillian Ward ug BGYO member ug kanhi Clasher nga si JL Toreliza.

Matet mihatag og katin-awan sa  isyu

Subling giklaro ni  Matet de Leon nga wala sila nag-away sa iyang mga  igsoon, taliwala sa mga espekulasyon nga nitumaw sa niaging mga adlaw . Sa guesting niya sa  “i-Listen with Kara David,” iyang giklaro nga usa lamang kini ka  ginagmay nga “misunderstanding”  .

Nahimong sentro sa mga istorya ang ilang pamilya human sa unang anibersaryo sa pagpanaw sa Superstar nga si Nora Aunor.

“Beauty and the  Beast” singer mipanaw

Mitaliwan na sa  laing kalibotan ang   legendary American singer nga si Peabo Bryson didto  sa Georgia, USA niadtong Martes , Hunyo 2 sa edad nga 75, kini  suma pa sa opisyal nga statement nga  gipagawas sa pamilya singer .

Nahitabo ang iyang kamatayon pipila ka adlaw  human siya na-stroke niadtong Mayo 31. Nailhan si Bryson tungod sa iyang mga hit nga kanta lakip na ang “Beauty and the Beast “ kauban si Celine Dion .

Siya usab ang nagpasikat sa “ A Whole New World”  kauban si Regina Belle.  Lakip sa iyang sikat nga mga  awit kay “ If Ever You're in My Arms Again”  ug “Tonight I Celebrate My Love”

Ms. Maricaban 2026 karong Hunyo 10

Opisyal nang gipaila ang 13 ka kandidata nga magtigi alang sa korona sa Miss Maricaban 2026 atol sa ilang unang public appearance ug sashing ceremony nga gihimo sa niaging adlaw didto sa  MJ Square sa Santa Fe, Cebu.

Ang mga  kandidata  kay sila Jasmin Angeleen Schaeffer, Shaiya Maine Alob, Rena Grace Bayawa, Neliza Maryle Ofril, Kristle Zsareen Alob, Donita Rose Suico, Francisca Maeyah Ofianga, Hilka Mae Giducos, Jeliza Claire Espinosa, Juanita Marie Grochowski, Shybell Sipalay, Shassy Shane Villaceran, ug Diana Isabella Blardony.

Ang coronation night kay  pagahimoon karong Hunyo 10, 2026, alas 8 sa gabii sa Maricaban, Santa Fe, Cebu .

Si  Santa Fe Councilor Jaypee Lao   maoy magsilbing pageant director. — Grezy Mie Sibay