EDITORYAL — Takulahaw lang

Sa usa ka damhang panghitabo sa Senado kagahapon, nibutho si Senador Chiz Escudero gikan sa mayoriya aron motambong sa sesyon nga unta dili madayun tungod sa kawalay quorum,  nga niresulta sa pagkatangtang pagka Senate President ni Senator Alan Peter Cayetano.

Kagahapon, naputos og pagsaway sa publiko ang Senado tungod wala  motambong sa trabaho ang mayoriya pinangulohan ni Cayetano.

Bugtong naa didto ang minoriya nga nanawagan sa mga kaubanan sa mayoriya sa pagtambong sa trabaho aron mapadayun ang ilang mga ginbuhaton isip mga magbabalaod.

Ikaduhang adlaw na unta to kagahapon nga walay sesyon ang Senado human wala nakapadayun ilang trabaho niadtong Martes tungod sa pagpamauli sa mga miyembro sa mayoriya kay nasagmuyo sa nahitabo.

Matud pa sa minoriya, dakong paglapas sa Senate Rule ang gibuhat sa mayoriya pinangulohan ni Cayetano nga ni-absent  silang tanan nga walay importanteng rason kondili ang kahadlok nga siya mapulihan.

Samtang nagsige og panawagan ang minoriya pag-awhag sa mga kaubanan sa mayoriya nga patambungon ug buhaton ang ilang mandato isip mga magbabalaod, nagsige sad og livestreaming sa Facebook si Cayetano nga nagsige og pamasangil nga gisigehan og sulsol sa minoriya ang iyang mga kauban nga motapon sa ila.

Iyaha sab giklaro nga wala siya mahadlok pulihan, basta ang importante niya nga magpabilin silang 13 ka senador sa mayoriya. Butang nga dili niya kayang pugngan ug wala niya mapangandami ang sunod nga nahitabo pagkahapon.

Apan takulahaw lang, kalit nga nibutho si Escudero sa Senado kagahapon sa hapon hinungdan nga nagka quorum ang sesyon. Ang gikahadlokan ni Cayetano nga siya mapulihan, nahitabo gyud.

Pag-abot ni Escudero, niabot silang tanan og 12 ka senador nga subay sa Senate Rules legal kini nga gidaghanon para matawag na nga quorum ug makapadayun sa ilang trabaho ang tanan ug tanang desisyon nilang buhaton legal.

Gideklarar dayun nga bakante ang tanang posisyon sa mga komitiba ug ang Senate President Pro Tempore ug ang Senate President.

Si Sen. Win Gatchalian maoy gitudlong Senate President Pro Tempore samtang walay gitudlo nga bag-ong Senate President tungod gikinahanglan nga 13 ka senador ang mobotar para niini.

Human sa pagtudlo sa mga bag-ong tsirman sa mga komitiba, gideklarar dayun ang Sine Die sa Senado. Mobalik sila karon ng State of the Nation Address (SONA) sa Hulyo.