Expulsion ug resignation

Gitangtang sa 265 ka mga kaubang kongresista si Kiko Barzaga kay nagpakauwaw kini sa Ubos Balay Balauranan. Aduna lamay 14 ka mga kongresista ang milaban kang Barzaga lakip niini sila Erice ug Richard Gomez.

Sa wala pa tangtanga sa iyang pagka kongresista, duha na ka higayon nga gisuspenso si Barzaga ug wala padawata sa iyang suweldo tungod sa iyang mga komento nga nagsaway sa gihimo sa iyang mga kaubang kongresista ug sa gobiyerno.

Sa usa sa mga post ni Barzaga sa social media iyang giingon nga ang Ubos Balay Balauranan "Crocodile Farm." Wala malipay niini ang iyang mga kaubang kongresista. Ila kining giisip nga pagpakauwaw sa Ubos Balay Balauranan.

Aduna pa diay uwaw ang mga kongresista? Bato-bato sa langit ang maigo mao ray mabukol. Nganong masuko man sila kun dili sila ang gipasabot ni Barzaga nga buaya?

Si Barzaga ba ang nagpakauwaw sa Ubos Balay Balauranan o sila ra mismo ang mga kongresista?

Igo rang nagsulti si Barzaga sa tinuod. Dili ikalimod, gamay nalang ang mga kongresista nga dili buaya. Sumaa, pila sa mga kongresista ang "Tongresista ug Kongtraktors"? Pila sa mga kongresista ang nakigkonsabo sa mga kontraktors sa paghimo sa mga proyekto nga dili makita ug kun makita man substandard samtang ang uban nilang proyekto gikompleto na sa pagbayad apan wala pa diay mahuman.

Nagsulti lang si Barzaga sa tinuod ug tungod niini siya gitangtang sa iyang mga kauban. Gumikan niini gihikawan sa mga buaya og representasyon sa Ubos Balay Balauranan ang katawhan sa ika-upat nga distrito sa Cavite.

* * *

Nanawagan ni Senate President Alan Peter Cayetano ang minority block sa pagkanaug sa iyang pagka presidente sa Senado tungod kay giabandonar kuno niini ang iyang trabaho human sa sunod sunod nga mga adlaw nga wala kini ug mga kauban sa mayorya motunga sa session sa Senado. Dereliction of duty kuno ang gihimo sa mayorya ug ni SP Cayetano maong ila kining pakanaugon sa pagka presidente sa Senado. Una, nag-walk out ang mga Senador nga sakop sa minorya aron dili mausab ang rules sa Senado. Sunod wala pod motunga sa ilang session ang mayorya aron dili makuha sa minorya ang mga komitiba nga gihuptan sa mga sakop sa mayorya aron madayon ang imbestigasyon sa Blue Ribbon Committee nga mag imbestigar sa flood control scandal.

Karon, nganong moreklamo man ang mga sakop sa minorya kun dili manunga ang mga sakop sa mayorya nga sila man ang naguna-una. Mora man sila og mga bata nga masuko kun bawsan.