Escudero nibutho sa Senado; Cayetano di na SP
CEBU, Philippines — Naputol na ang tulo ka adlaw nga walay mga sesyon sa Senado kagahapon, Miyerkules Hunyo 3, human kalit nga nitunga ang miyembro sa mayoriya nga si Sen. Chiz Escudero sa plenary hall ug niuban sa nagpaabot nga mga miyembro sa minority.
Ang pagbutho ni Escudero maoy nakaingon nga natawag nga naay quorum ang Senado ug nakahimo sila sa pagpalagpot sa ilang lider nga si Senador Alan Peter Cayetano ug ang mga tsirman sa nagkalain-laing komitiba.
Duha ka adlaw nga walay nabuhat ang Senado tungod sa pagpamauli sa mayoriya niadtong adlaw nga Lunes sa dihang gidakop si Sen. Jinggoy Estrada tungod sa kasong plunder may kalabotan sa flood control projects.
Kagahapon sa pagbutho ni Escudero napun-an og usa ang onse ka senador sa minoriya. Naghimo dayun og roll call ug gideklarar nga dunay quorum ug tanang chamber positions gideklarar nga bakante hinungdan nga dunay nahitabong kausaban sa mga lider sa mga komitiba.
Ang Senate president pro tempore mao na si Sen. Sherwin Gatchalian kinsa nibarug dayun isip presiding officer.
Isip maoy kinatas-an og posisyon, si Gatchalian maoy nahimong acting Senate president, matud pang Sen. Erwin Tulfo sa press conference human sa sesyon. Wa karoy Senate President ang Senado human nga ang posisyong gihuptan ni Senador Alan Peter Cayetano gideklarar nga bakante/
Matud pang Tulfo, subay sa 1949 Supreme Court ruling, kinahanglang 13 ka senador ang mobotar para makapili og Senate president maong pabilin nga si Cayetano gihapon ang naa sa pinakataas nga posisyon.
Apan gisupak ni ni Sen. Ping Lacson kinsa sa iyang tweet niingon nga apil sa gideklarar nga bakante ang posisyon sa Senate President.
Human sa sesyon, gideklarar sa chamber nga tak-upan ang 20th Congress mas sayo sa gitakda karon untang adlawa nga adjournment sine die.
"This is not a political contest. I am not taking sides. I am taking a stand for the Senate," matud pang Escudero. "My allegiance is not to any faction, personality, group or alliance," dugang pa niya.
- Latest
