9 poste ng kuryente bumagsak sa Bulacan
OBANDO, Bulaca, Philippines — Magkakasunod na nabuwal ang 9 na poste ng Meralco kamakalawa ng hapon dahil sa lakas ng hangin dulot ng habagat sa Brgy. Tawiran at Paco ng nasabing bayan.
Ayon sa ulat ng Obando Municipal Disaster Risk Reduction and Management Office (MDRRMO), dakong alas-2:00 ng hapon nang magkakasunod na bumuwal ang 9 na poste ng Meralco sa kahabaan ng sabana ng Brgy. Tawiran at Paco sa Obando, Bulacan.
Dahil sa pangyayari, isinara sa lahat ng uri ng sasakyan ang nasabing kalsada at walang makakaraan sa magkabilang lane o linya dahil sa naghambalang ang mga malalaking poste na bumagsak sa gitnang bahagi ng nasabing kalsada.
Ayon sa Obando MDRRMO, masyadong mababaw ang pagkakabaon ng mga poste kung kaya bumigay ang mga ito at tuluyang bumuwal ang 9 na poste.
Pinag-iingat ng mga opisyal ng Obando MDRRMO ang mga tao na naglalakad sa kahabaan ng sabana dahil sa mga nagkalat na malalaking kawad ng kuryente.
Kasalukuyan nang nagsasagawa ng clearing operations ang mga tauhan ng Meralco at inaayos na ang mga bumuwal na poste.
Inaasahang magbabalik na ang supply ng kuryente ngayong araw na ito at madaraanan na rin ang nasabing kalsada.
Walang naiulat na nadisgrasya o nasaktan sa nasabing insidente.
- Latest
