Paglubong sa atraso
Dayong kapupos sa termino ni Alan Peter Cayetano isip speaker sa House of Representatives niadtong Oktubre 2020, nangita siya og paagi pagpabilin sa gahom. Bisan makalapas sa term sharing agreement nilang Lord Allan Velasco. Nisuway siya sa paglangay sa pagpasar sa 2021 budget.
Naningkamot siya karon pagpangita og isyu aron magpabilin nga presidente sa Senado. Dihang na-apiki ang pagpamugos nga pabotaron si Bato dela Rosa bisan nagtagu-tago, nahunahunaan niya ang imbestigasyon sa flood control scandal. Kay naapsan man sa arrest warrant sa Sandiganbayan, gihimo na lang bayani si Jinggoy Estrada.
* * *
Dihang napakyas ang iyang maniobra sa budget niadtong 2020, ug kay naklaro man nga mayoriya sa mga kongresista nisuporta ni Velasco, gi-shutdown niya ang plenary hall sa House pinaagi sa pagputol sa kuryente ug wifi.
Gi-shutdown niyang Senado dayong butobuto niadtong gabii sa Mayo 13. Gipawong niyang aircon ug wifi sa session hall niadtong Lunes. Kon makakuha na sila og dugang duha ka sakop, ambot sundon ba sa Senate minority bloc ang gihimo ni Velasco niadtong 2020 nga pagbalhin sa sesyon gawas sa House aron mapalagpot si Cayetano.
* * *
Si Bise Presidente Sara Duterte nitabang ni Velasco pagbaraw ni Cayetano. Isip anak ni kanhi Presidente Rodrigo Duterte nakumbinser niyang mga kongresista pagbiya ni Cayetano.
Si VP Sara ang gituohan nga labing maka-benepisyo kon si Cayetano nga modumala sa iyang impeachment trial. Kon magpabilin ang majority bloc, mabalibaran ang pag-abli sa bank accounts ug ubang mga ebidensiya nga makadaot niya. Kana kon ipadaplin ni Cayetano ang naandang kamadinumtanon ug kalimtan ang karaang atraso ni VP Sara.
* * *
Si VP Sara nahibawo nga sama niadtong 2020 apiki na si Cayetano. Mahimong magpabilin sa puwesto pero 10 na lang ang mahibilin sa majority bloc inig sugod sa impeachment trial sa Hulyo 6 kon mapriso si Joel Villanueva sunod semana. Ang 11 ka mga sakop sa minority bloc mao nay magbuot sa direksiyon sa husay.
Maong bisan sa ilang away, mahimong mapugos nga mag-alyansa silang VP Sara ug Cayetano aron pagsabotahe sa impeachment trial. Pero kon kutob ra sila sa pag-boykot sa impeachment trial, moulbo sa kasuko ang katawhan. Nga dili maayong balita para sa ilang politikanhong mga ambisyon sa 2028.
* * *
- Latest
