Batch 2003 5-0 na sa SHAABAA Season 29

CEBU, Philippines — Si Daryle Tan mirehistro og double-double nga 28 puntos ug 18 ka rebounds uban ang duha ka rebounds ug duha ka steals sa dihang ang Cebu Landmasters Batch 2003 mibugha sa Magis Medical Services, 99-54, alang sa ikalima nilang sagunson nga daog sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Mibubo si Justin Huang og 16 puntos, 11 ka rebounds, lima ka assists ug usa ka steal, si Leandro Gollon miamot og 12 puntos ug upat ka rebounds samtang si Rich Tuadles mitampo og 10 puntos, pito ka rebounds ug duha ka assists sa dihang gipahugtan sa Batch 2003 ang ilang pagkupot sa liderato sa Division A uban ang perpektong 5-0 rekord.

Sa ubang mga duwa sa Division A,  ang Core Pacific miinat sa ilang baraha ngadto sa 4-1 human gipayaka ang Big Three Pizza Batch 1996, 73-65, samtang ang ARQ Batch 2001 milampornas sa Batch 2002, 109-46, alang sa ikatulo nilang daog sa upat ka duwa.

Si Joel Co maoy nangu sa Core Pacific uban ang 20 puntos, 13 ka rebounds ug upat ka assists. Si Jeremy Huang midugang og 15 puntos ug 13 ka rebounds samntang si Johannes Chua mihipos og 11 puntos ug tulo ka assists.

Si Mark Hing mibirada og 18 puntos ug 13 ka rebounds alang sa  Batch 2001 samtang si Jason Arquisola mitimbre og 17 puntos, 10 ka rebounds, lima ka assists ug usa ka steal. Sila si Jim Paul Lamoco ug Gino Peralta dako sab og naambag uban ang 15 ug 12 puntos.

Sa Division B, ang '04 The Win Batch 2004 nagsolo karon sa ikaduhang puwesto uban ang 5-1 rekord human gipakaging ang Hatch IT Solutions Batch 2010, 78-73, samtang ang Insular Square Batch 2005 mipukan sa Batch 2008, 91-86, alang sa ikaduha nilang daog sa lima ka duwa.

Si Kyle Valmoria  ang bida sa Batch 2004 uban ang 32 puntos, pito ka rebounds ug upat ka assists. Nagparamdam sab si Franco Augusto Te uban ang 22 puntos, 24 ka rebounds ug duha ka assists.

Sa gihapon, si Elddie Cabahug nanghugyaw uban ang 49 puntos, pito ka rebounds ug duha ka assists alang sa  Batch 2005. Gisuportaan siya ni Aaron Uy nga mikimada og 18 puntos, lima ka rebounds ug duha ka assists ug Antonio Datan ngamipupo og 11 puntos ug 13 ka rebounds.

Sa Division C, si Rezald Joshua Dacalos mikuha og atensiyon uban ang makapakurat niyang triple-double nga 38 puntos, 33 ka rebounds ug 10 ka assists aron ibandera ang 730 Autoworks Batch 2024 ngadto sa 94-89 nga pagpaluhod sa Comforser Tires Batch 2022.

Si Rey Marcus Fuentes IV mipatuasik og 30 puntos, siyam ka rebounds ug duha ka assists sa dihang gilampaso sa FADI Batch 2021 ang CHEK Technologies Batch 2025, 105-70, samtang sila si Chaz Cokaliong, Anton Chua, Lorenzo Otero, ug Janjan Jaboneta nagkumbinar og 48 puntos aron ituboy ang BRX Batch 2015 ngadto sa 86-64 nga pagkulata sa Rufrance LPG Batch 2026.