‘Rosaryo’ (Part 4)
ININTERBYU na ako ng babaing manedyer na ang pangalan ay Mrs. Aurora Pineda. Nabasa ko ang name niya sa marmol na nakapatong sa mesa.
Mabait at mahinahong magsalita si Mrs. Pineda.
“Sa palagay mo ba Mr. Manahin kung ikaw matatanggap dito, makakaya mo ang responsibilidad bilang helper?”
“Opo Mam. Makakaya ko po.”
“Makakaya mo ba ang mabibigat na trabaho at magagampanan ito nang tama?”
“Opo, Mam.”
“Maipangangako mo bang susundin ang mga alintuntunin ng kompanya?”
“Opo Mam.”
“Kung ganun, tanggap ka na bilang helper.”
Hindi ako makapaniwala. Sinalat ko nang lihim ang rosaryo sa aking bulsa at nagpasalamat.
“Ang trabaho mo ay maghahakot ng mga sapatos na bagong deliber patungo sa bodega sa mezzanine.”
“Opo Mam.”
“Ikaw din ang kukuha ng mga sapatos na ino-order ng customer.”
“Opo Mam.”
Sinabi ng manedyer ang aking sasahurin.
“Bukas ka na mag-uumpisa.”
“Salamat Mam.” (Itutuloy)
- Latest
