JM Abarca nanghawod sa Converge skate competition

CEBU, Philippines — Ang Liloanon nga si John Michael “JM” Abarca mipakurat sa miyembro sa Philippine team nga si Motic Panugalinog aron paglugwa nga kampiyon sa men’s open street battle sa labing unang Converge Xponential Tour Skate Competition didto sa Talisay City Skatepark niadtong weekend.

Ang 17-anyos nga si Abarca mitapos sa kompetisyon bitbit ang labing taas nga 6.85 puntos aron sakmiton ang titulo.

Si Panugalinog sa dakbayan sa Sugbo mitapos sa ikaduhang dapit uban ang 6.70 puntos samtang ang Oponganon nga si Trunks Manalo maoy miokupar sa ikatulong puwesto uban ang 6.40 puntos. Sa women’s division, si Sarah Laurente sa dakbayan sa Lapu-Lapu ang mibira sa korona uban ang 3.68 puntos.

Ang mga representante sa Talisay nga sila si Queenxy Deiparine (3.19) ug Kate Benolirao (2.56) mipahiluna sa ikaduha ug ikatulo nga dapit. Ang garbo sa siyudad sa Carcar nga si Mark Joseph Langbid maoy naghari sa street skate class B. Sila si Harck Garcia sa Talisay ug John Daniel Lacaron sa Conlacion mitapos nga ikaduha ug ikatulong dapit.

Sa laing bahin, ang mga pambato sa San Fernando maoy midominar sa surf skate event. Si Eunice Manugas ang labing paspas sa women’s division ug gisundan nilang Salome Casas sa Lapu-Lapu ug Maeghan Villanueva sa Naga. Sa men’s category, sila si Amie John Sasil ug John Louie Candare sa San Fernando ang miangkon sa nag-unang duha ka dapit samtang si Odilio Hermosa sa Talisayt maoy ikatulo.