Mahal pa rin ang ex

Dear Dr. Love,

Tawagin niyo na lang po akong Cel. Sumusulat ako dahil gulong-gulo ang puso ko ngayon. Limang buwan na ang nakalipas nang maghiwalay kami ng ex-boyfriend ko.

Kung tutuusin, maliit na bagay lang ang pinagmulan ng away namin na nauwi sa hiwalayan dahil na rin sa pride at pagod.

Akala ko noong una ay kaya ko, pero habang lumilipas ang mga araw, lalo ko lang napatunayan na mahal ko pa rin siya at siya lang talaga ang gusto kong makasama.

Kaya lang, mukhang huli na yata ako. Nitong nakaraang linggo, naglakas-loob akong magtanong-tanong sa mga kaibigan namin dahil plano ko na sana siyang kontakin para makipagbalikan.

Doon ko nalaman na may masugid na siyang manliligaw nga-yon, at unt-unti na raw nagbubukas muli ang puso niya sa iba.

Masakit para sa akin na isiping mapupunta siya sa iba dahil sa pagkukulang ko. Dapat ko pa bang ipaglaban ang nararamdaman ko at umamin sa kanya?

O dapat ko na lang ba siyang hayaan at manahimik para hindi magulo ang buhay niya? Takot din po akong ma-reject kung sakaling piliin niya ang bago niyang manliligaw.

Cel

Dear Cel,

Ang sakit ng pagsisisi ay mahirap pasanin, lalo na kapag nakikita mong ang taong mahal mo ay natututo nang humakbang pasulong habang ikaw naman ay naiwan sa nakaraan.

Pero heto ang ilang bagay na dapat mong pag-isipan bago ka gumawa ng hakbang: Una, tandaan mo na “manliligaw” pa lang ang bago at wala pang pormal na relasyon.

Ibig sabihin, bukas pa ang pinto at hindi krimen ang magpahayag ng nararamdaman mo.

Kung mananahimik ka ngayon, habang-buhay kang mumultuhin ng tanong na, “paano kung nag-lakas-loob ako?”

Pangalawa, kung kakausapin mo siya, huwag mong unahin ang demand na magbalikan kayo.

Unahin mo ang paghingi ng tawad sa mga naging pagkukulang mo noon at ang pagpapakumbaba. Ipaalam mo sa kanya na natauhan ka na at mahal mo pa rin siya.

Panghuli, ihanda mo rin ang iyong sarili sa anumang resulta.

Dahil limang buwan na ang nakalipas, may posibilidad na sarado na ang puso niya o mas pinipili na niya ang kapayapaan sa bago niyang buhay.

Kung mangyari man ‘yun, tanggapin mo ito nang may respeto para tuluyan ka na ring makapagsimula ng bagong yugto ng buhay mo.

Maglakas-loob ka, Cel. Kausapin mo siya nang masinsinan at personal. Mas madaling maghilom ang sugat ng rejection kaysa sa sugat ng habang-buhay na panghihinayang.

DR. LOVE