Insidente sa sunog sa siyudad sa Mandaue Nikunhod

CEBU, Philippines — Gitaho sa Bureau of Fire Protection (BFP) sa Mandaue City nga mikunhod og 12 porsyento ang mga insidente sa sunog karong tuiga kumpara sa samang panahon niadtong 2025.

Matod ni Mandaue Station Fire Chief Inspector Alvin Torion, 22 ka mga insidente sa sunog ang natala hangtod sa Mayo 2026, ubos kini sa 25 ka insidente nga natala sa samang panahon sa miaging tuig.

Gipasabot ni Torion nga ang pagkunhod sa mga sunog resulta sa mas hugot nga pagpatuman sa programa nga Oplan Ligtas na Pamayanan ug uban pang kalihokan sa pagpugong sa sunog nga gipahigayon sa BFP.

Nakatabang usab ang maayong kahimtang sa panahon sa pagpakunhod sa gidaghanon sa mga insidente sa sunog.

“Kay ang sunog man gud, aksidente man na ug usahay dili nato kini makontrol,” matod ni Torion.

Gitug-an ni Torion nga ang sunog sa mga panimalay nagpabiling pinakadaghan nga matang sa insidente sa sunog sa Mandaue City.

Aron malikayan ang sunog, gitambagan ni Torion ang mga residente nga likayan ang sobra nga paggamit sa mga electrical circuit ug kanunay susihon ang ilang mga electrical appliance aron masayran kung adunay luag o depektibong koneksyon.

Giila sa BFP ang 10 ka barangay sa Mandaue City nga giisip nga prone sa sunog nga mao ang Subangdaku, Banilad, Tipolo, Paknaan, Canduman, Tabok, Guizo, Maguikay, Alang-alang, ug Pagsabungan.

Gikan sa 10 ka barangay, gipili sa BFP ang Subangdaku, Alang-alang, ug Guizo isip mga pilot area sa Oplan Ligtas na Pamayanan.

Nagbutang usab ang BFP og mga barangay-based firefighters sa maong mga komunidad aron magmonitor sa posibleng mga peligro ug modawat og mga report ug reklamo gikan sa mga residente.

Nagpadayon ang BFP sa pagpatuman sa ilang Bayanihan Program nga nagtumong sa pag-ila sa mga peligro sa sunog sulod sa komunidad ug paghatag og pagbansay sa mga residente sa praktikal nga mga paagi aron maminusan ang risgo ug makatubag sa emerhensiya. — /MEL (BANAT NEWS)