Pulos bad news
Ang mosunod nga posibleng mahitabo sa Senado karong adlawa, Lunes, Hunyo 1, ang sugod sa kataposang semana sa ilang sesyon sa dili pa mobakasyon hangtod sa State of the Nation Address ni Presidente Ferdinand Marcos Jr. unya sa Hulyo 27, pulos dili makaayo para sa majority bloc ni Senate President Alan Peter Cayetano:
1. Kon luwatan na og arrest warrant si Jinggoy Estrada sa kasong plunder sa 5th Division sa Sandiganbayan, dili na siyang kaapil sa sesyon karong hapon ug dili mapasar ang kausaban sa lagda nga motugot sa remote voting sa Senado;
Kon wala gihapoy arrest warrant batok ni Estrada pero mapagawas na sa Sandiganbayan ang 90 ka adlaw nga preventive suspension order tungod sa kasong graft ug plunder nga gipasaka batok niya, dili gihapon siyang kaapil sa sesyon ug bisan sa pagsugod sa impeachment trial ni Bise Presidente Sara Duterte unya sa Hulyo 6;
* * *
2. Kon walay arrest warrant ug suspension order nga ipagawas batok ni Estrada hangtod karong alas-5 sa hapon, makatambong siya sa sesyon pero dili gihapon maaprobahan ang remote voting amendment;
Kon matinuod ang mga huhungihong nga dunay duha ngadto sa upat ka mga kauban niya sa majority bloc ang mobalhin sa minority bloc kay wala na ganahi sa ka-palaaway ni Cayetano ug sa daghang mga eskandalo nga niulbo sukad sa iyang paghupot sa liderato;
* * *
3. Bisan kon paukyab lang ang mga pasidaan sa kausaban sa liderato (kay ang tinuod nga kudeta hilom man nga ipatuman) ug mapakyas ang minority bloc sa pagkuha og dugang duha ka boto aron mapalagpot si Cayetano, ug kon mahinayon na gyod ang botasyon sa remote voting amendment, si Senate Minority Leader Tito Sotto mahimong mobotar pabor sa kausaban aron makapasaka og motion for reconsideration sa mosunod nga duha ka adlaw, kanus-a mas dako ang kahigayonan nga wala nay igong numero ang majority bloc; ugBisan magpabilin si Cayetano sa puwesto hangtod sa ilang bakasyon karong Hunyo 6, nga magpasabot nga siyay presiding officer inig sugod sa impeachment trial sa Hulyo 6, mahimong mapriso o masuspenso na si Estrada ug makasohan ug mapriso na si Joel Villanueva sa mosunod nga mga adlaw, ug ang minority bloc nay magbuot sa husay.
* * *
- Latest
