Foreign teams dumating na para sa AVC Women's Cup

CANDON CITY, Ilocos Sur — Nagdatingan na ang mga tropa ng Kazakhstan, Kyrgyzstan at Iran para sa Asian Volleyball Confederation (AVC) Women’s Volleyball Cup na hahataw sa Sabado dito sa Candon City Arena.

Ito ay sa gitna ng pagsuspinde ng International Volleyball Federation (FIVB ) sa Philippine National Volleyball Federation (PNVF) kamakalawa.

“Life goes on in volleyball and we’re here to help make sure the athletes and the programs are brought back to intense levels,” wika ni Philippine Olympic Committee (POC) President Abraham “Bambol” Tolentino.

Suportado rin ni Philippine Sports Commission (PSC) Chairman Patrick “Pato” Gregorio ang local volleyball community.

“Volleyball is coming of age — that really comes with challenges. But this is the most important time to support our national athletes,” ani Gregorio. “No distractions. Play for the country with your hearts, Alas — PSC will always back you up.”

Sa pagkakasuspinde ng FIVB sa PNVF ay bumuo ang international federation ng isang Ad Hoc Committee na siyang mamamahala sa local volleyball kung saan inaasahang magiging “caretaker” ang POC katuwang ang PSC.

Wala pang pinal na listahan ang Alas Women para sa Candon City tournament na pamamahalaan ni Mayor Eric Singson at inihahandog ng PSC, FIVB, Volleyball World at AVC.

Nakatakda ang Torneo sa Sabado hanggang Hunyo 14.

Magtutungo ang Alas spikers sa Candon City ngayong araw kasunod ang mga koponan ng South Korea, Indonesia, Chinese Taipei, Hong Kong, Uzbekistan, Australia, Vietnam at Lebanon.

“I welcome the 12 teams for the AVC Women’s Cup, it’s another renaissance moving forward for Philippine volleyball,” wika ni AVC President Ramon “Tats” Suzara.

Matapos ang Candon City, lilipat ang elite volleyball action sa PhilSports Arena sa Pasig City para sa Week 2 ng Women’s Volleyball Nations League sa Hunyo 17 hanggang 21 tampok ang Japan, Italy, United States, Serbia, Dominican Republic at Czechia.