Adto sa baba sa buaya

Namahayag si Senador Ping Lacson nga mahimo gihapon nga makatambong sa impeachment trial kadtong mga senador nga nag-atubang og kaso unya mabilanggo, apan dili pinaagi sa online voting, kon dili pinaagi sa pagpangayo og pagtugot sa korte (leave of court).  Supak ang pundok ni Lacson nga adunay online voting bisan kon aduna na kini precedent kaniadto pabor ni kanhi Senador Leila de Lima.  Mas sayon ang pag-amendar sa house rules sa senado alang sa maong katuyoan, kay sa pagpangayo og leave of court, tungod kay anaa man sa mayoriya ang mga senador nga nag-atubang og kaso. Sama ra’g miingon si Lacson nga, “Hatagan ko ikaw’g kuwarta pero adto kini kuha-a sa bâbâ sa buaya.”  Madahaan!

“Ampo pa’y tigre”

Gitanyagan ni DILG Secretary Jonvic Remulla si Senador Jinggyo Estrada og duha ka kapilian – mosurender o magpadakop.  Kabahin kining maong tanyag sa kaso’ng plunder ug graft and corruption nga gipasaka sa Ombudsman batok sa senador.  Mora’g pre-mature pa man ang maong tanyag kay wala pa ma’y arrest warrant nga giluwatan ang Sandiganbayan.  Panggulat ra ba kaha kining pamahayag ni Remulla? Apan kon kaliwat si Senador Estrada ni Tiago’ng Bangkilan, motubag lang tingale kini sa pag-ingon nga, “Ampo pa’y tigré.”  Ateerr!

Mas maayo ang gubat

Alang kang senate president alan Peter Cayetano, ang pag-imbestigar ug pagpasaka’g kaso batok sa ubang miyebro sa Majority bloc sa senado, gihimo aron sa paghulga ug pagpanghadlok kanila sa katuyoan nga mobalhin sila balik sa minoriya.  Daghan ang mouyon sa pamahayag ni SP Cayetano labi pa kay ipahigayon na ang impeachment trial batok sa bise presidente. Mao kana’y giingon nga, “Mas maayo pa ang gubat kay sa politika; kay sa gubat, kon mamatay ka, kausa man lang, apan sa politika, mahimong sa makadaghan ka patyon ug sa nagkalain-laing pamaagi.”  Muleeng!

Nag-atubang na usab og daghan’g pagsaway ang Cebu City agriculture department tungod kuno sa kakulang sa mga pagpangandam sa nagsingabot nga El Niño phenomenon, diin ang bag-ong nabalik nga City Agriculturist nga si Joelito Baclayon mao ang sentro sa mga pagsaway sa mga konsehal.  Mahimong adunay basehan ang pagpanaway sa mga konsehal apan angayan usab tan-awon kon husto ba sa suporta ang maong departamento.  Komento pa bitaw sa akong amigo, “Wala man gani mangandam ang nasudnon’g kagamhanan sa El Niño kay lage, maanad ra kuno ta.”  Fezteleern!

Unique Nga Obituary

Mipahigayon ang mga vendors ug supporters nga supak sa redevelopment sa Carbon Public Market og usa ka satirical nga Santacruzan parade uban ang panawagan sa sa pag-ampo nga unta ang modernisasyon sa Carbon dili mosangpot sa privatization.  Daghan tinuod ang paagi pagpadayag sa pagsupak ug talagsaon kining gibuhat sa mga vendors kay maka-protesta na, makarampa pa sa ilang kaanyag.  Makapahinumdum sa usa ka biyuda nga buot momantala og obituary sa namatay niyang bana. Aron makadaginot sa bayronon, iyang gikombenar ang obituary sa pag-ingon nga, “Fausto died; Pick-up truck for sale.”  Pagkatoytoy!