Internet café gi-ransak

CEBU, Philippines — Nasagmuyo ang kadagkoan sa dakbayan sa Talisay sa nahitabong pag-ransak sa usa ka internet café sa nagpailang mga polis diin gipangkuha ang mga cellphones sa ilang mga customers ug giguba pa gyud ang ilang CCTV camera.

Sumala pa sa report sa One Balita Bai sa One PH, pito ka armadong lalaki nga nagpailang mga polis ang nisulod sa internet cafe sa Barangay Linao, Talisay City, Cebu niadtong Byernes sa hapon, May 22, 2026.

Matud pa gipangkuha sa maong mga armadong lalaki ang mga cellphone ug uban pang personal nga gamit sa mga customer.

Ang mga armadong lalaki  nagtabon sa ilang mga nawong sa dihang misulod sa maong establisemento ug dayon gipangtionan og armas ang mga customer.

Makita sa CCTV nga gipalingkod sa daplin ang mga kustomer ug gipaisa ang ilang kamot , unya pagkahuman gitagsa-tagsa og panguha ang ilang mga cellphones ug mga gamit.

Duna say mga lalaking kustomer nga gipahubo. Nakita sab sa CCTV nga usa sa mga armdong lalaki ang nakabantay sa CCTV camera ug gikatahong giduol nila ni ug giguba.

Sa pagbiya sa mga armadong lalaki, ilang gidala ang pipila ka customer apan gibuhian ra usab. Sumala sa interbyu sa One Balita Bai sa tag-iya sa internet cafe nga si Myrna Anonat, nagpaila nga mga pulis ang mga suspek sa pagsulod sa ilang establisamento ug duna daw silay raid.

Sa sinugdanan nisalig sila sa mga armadong lalaki kay nagpaila man sila nga mga polis, apan nasagmuyo sila kun nganong giguba man nila ang CCTV sa ilang shop.

Gani pagkasunod adlaw niana, gikatahong dunay nibalik nga mga lalaki sa ilang internet café nga naka-sibilyan ug nagpailang taga”Province” sila ug gikatahong nihatag og kwarta nga bayad sa naguba nga CCTV camera.

Ang maong hitabo naabot sa Talisay City Hall ilabi na sa konseho ug nisaad nga mangita gyud sila og hustisya alang sa mga biktima.

Gipadayag ni Konsehal Danny Caballero, Chairman sa Peace and Order sa Talisay City Council nga kinahanglan mapanubag ang mga responsable, bisan pa man kon pulis o sibilyan pa sila.

Wala mohatag og pamahayag ang Talisay City Police Station bahin ani, gawas lang sa pag-ingon nga wala silay operasyon nga gilusad anang adlawa. (BANAT NEWS)