Duterte ray mokonbikto niya
Kon mapakita nang Prosecutor Karim Khan sa International Criminal Court (ICC) ang nahipos nga mga ebidensiya ngadto nilang Nicholas Kaufman ug ubang mga abogado sa depensa, ilang kliyente nga nag-birthday gahapon nga si kanhi Presidente Rodrigo Duterte ang labing dili makugang.
Kay ang mga ebidensiya nga gipaabot nga gamiton pagkonbikto ni Duterte gikan ra sab niya–mga dokumento sa iyang administrasyon, iyang adlaw adlaw nga mga diskurso nga nidasig sa extrajudicial killings (EJKs) ug iyang mga testimoniya sa Kongreso nga niangkon og responsibilidad sa EJKs.
* * *
Mga dokumento nga nimatuod nga si Duterte ang nagsugo ug sa kadaghan sa EJKs:
Philippine National Police Command Memorandum Circular No. 16–2016, gipirmahan ni kanhi PNP Chief ug karon Senador Bato dela Rosa ug giaprobahan ni Duterte sa Hulyo 1, 2016, nga nipatuman sa Project Double Barrel ug gisabot sa kapolisan nga sugo sa laktod nga pagpatay sa suspitsadong mga durugista; ug
Accomplishment report sa Office of the President (OP) nga nadawat sa Korte Suprema nga nagbutyag nga 20,322 ang namatay sa EJKs hangtod niadtong Nobyembre 2017.
* * *
Pipila sa mga diskurso ni Duterte nga niangkon sa mga krimen:
Gisugo niyang National Bureau of Investigation (NBI) niadtong Disyembre 7, 2016 pag-usab sa kasong murder ngadto sa homicide batok sa mga polis nga nakapatay ni Mayor Rolando Espinosa Sr. sulod sa prisohan sa Baybay City (nakapiyansa dayon ang mga polis nga gipangulohan ni Koronel Marvin Marcos, kinsa iyang gi-promote); ug
Nipasidaan siya niadtong Septiyembre 2016 pagpatay og tulo ka milyon ka gidudahang drug addicts human siya gihulagway nga susama ni Adolf Hitler.
* * *
Mosamot kalig-on ang kaso batok ni Duterte, segun ni Atty. Joel Botuyan, abogado sa mga biktima sa EJKs, kon mosumiter si Justice Secretary Boying Remulla sa ICC og mga dokumento pagmatuod sa iyang mga kumpisal sa Senado sa niaging semana:
Nga walay police reports ang 95% sa EJKs atol sa administrasyong Duterte (apil nang biktima nga segun sa death certificate nga dunay cardiac arrest pero nabuslot ang ulo sa bala); ug
Nga gihulga sa mga polis ang mga piskal nga nisuway pag-imbestigar sa mga kasong gipasaka sa mga tagtungod sa mga biktima sa EJKs.
* * *
- Latest
