Kinakusgan nga alas
Imbes magpadayon sa ilang inartista nga pag-distansiya sa impeachment complaints batok ni Bise Presidente Sara Duterte, angay'ng gakson nilang Presidente Ferdinand Marcos Jr. ug House Speaker Martin Romualdez nga karon ang labing sakto nga panahon pagpahagsa sa dinastiya nga gipasanginlan sa pinatyanay ug kinawatay.
Kon padayong mangiyugpos, mahimong maapsan sila sa mga panghitabo. Mahimong mabalit-ad ang sitwasyon: Imbes mga Duterte maoy mapapas, dinastiya na hinuong Marcos-Romualdez maoy mabitay. Mahimo ganing mahigmata ang katawhan nga gikinahanglan sa nasud dili ang nagbangga nga mga pamilya kon dili ang mas tarung nga liderato.
* * *
Angay'ng molihok dayon silang Marcos ug Romualdez kay sila karon ang nagkupot sa kinadaghanan nga mga alas:
• Ni-abiba ang katawhan sa mga imbestigasyon sa Kongreso nga nakabisto sa labing baho nga mga sekreto sa mga Duterte ug sa ilang mga alyado samang Apollo Quiboloy, Michael Yang ug Harry Roque;
• Mas daghan pang mga polis kay sa ilang gibantayan nga tapok sa trolls ug ubang sinuholan nga mga dumadapig sa mga Duterte sa Edsa; ug
• Walay makalalis sa ilang makabungog nga mayoriya sa House of Representatives ug sa Senado.
* * *
Kon yak-an nilang impeachment complaints kay magpaabot human sa eleksiyon sa Mayo 12, 2025, mahimong:
• Makapasiugda og lain nga mga paukyab ang mga Duterte nga makapabisto sa kataphaw ug kakurakot sa dinastiyang Marcos-Romualdez (nga mahimong molabaw pa sa ilang mga anomaliya), maibanan ang suporta sa administrasyon ug madugangan ang mga magprotesta sa kadalanan; ug
• Mausab ang dagway sa Senado nga mas daghan na ang makaamgo nga dili sila kinahanglan nga magpadiktar sa Malakanyang.
* * *
Labing maayong resulta ining panag-unay sa mga dinastiya mao nga ang katawhan makaamgo nga naa nila ang labing dagkong alas:
• Tungod sa naghinobrang ka-bastos sa mga Duterte ug makapalibog nga atras-abante ni Marcos, dili diay sila mapugos pagpili sa usa ka sungayan batok sa laing sungayan, kay mahimo diayng motuboy og mas takos ug mas ligdong ug mas kasaligan nga mga lider; ug
• Makapili sila og mas maayong mga senador, mga kongresista, party-list groups ug lokal nga mga opisyal sa 2025 aron mas andam nga makapadaog og presidente ug bise presidente nga dili Marcos ug dili Duterte ug dili pahoy sa 2028.
* * *
- Latest
