May oras pa ba sa impeachment?

Bisan sukwahi og baruganan si Presidente Ferdinand Marcos, Jr. sa dugay na nga gihugon-hugon nga impeachment batok ni Bise Presidente Sara Duterte,  wala ni kapugong sa daghang grupo sa hingpit nga pagsang-at og impeachment complaint niadtong Lunes.

Lakip sa mga grupo nga misang-at sa reklamo mao ang Tindig Pilipinas, Magdalo ug Mamamayang Liberal Partylist, mga pari ug uban pang sakop sa civil society group. Ilang giakusahan ang bise presidente og “betrayal of public trust, culpable violation of the constitution, and other high crimes.” 

Ang reklamo gisuportahan ni Kongresista Perci Cendaña sa Akbayan Partylist.

Dunay tulo ka paagi pagsugod sa impeachment sigun sa lagda sa Kongreso.  Una, kinahanglan ang verified complaint gikan sa bisan kinsa nga kongresista; ikaduha, kinahanglan ang verified complaint gikan ni bisan kinsa nga lumolopyo sa nasud uban ang endorsement sa usa ka kongresista; ug ang ikatulo,  mao ang usa ka resolusyon nga pirmado  sa  one-third (1/3) sa mga sakop sa House of Representatives. Sa ato pa mga 115 ka kongresista ang kinahanglang mopirma.

Kun subayon ang proseso sa unang duha ka mga paagi pagsugod sa impeachment, mura og apiki na kaayo sila sa oras sanglit duna na lay pipila ka adlaw nga nahabilin sa dili pa mo adjourn ang Kongreso alang sa Christmas break.

Segun sa ilang kalendaryo, kutob nalang sa Disyembre 20 ang ilang session. Mobalik sila unya na sa Enero 13 hangtod sa Pebrero 7. Ang sunod nga session unya na sa Hunyo 2 hangtod sa Hunyo 13 human sa election.

Apan way makapugong sa mga kongresista kun ilang lakturon ang proseso. Buot ipasabot nga dili nila gamiton ang unang duha ka paagi nga magkinahanglan og taas nga panahon tungod kay moagi pa sa kuti nga proseso sa Committee on Justice pagsuta kun husto ba ang porma ug bastante ba ang unod o substance niini.

Ang ikatulo nga paagi diin 1/3 lang sa gidaghanon sa mga kongresista ang kinahanglang mopirma sa usa ka resolution aron iimpeach si Duterte maoy posibling  dangpan sa mga kongresista nga nagtinguha pagtangtang sa bise presidente. Mao ni ang samang paagi nga gigamit kaniadto dihang gi-impeach si kanhi Chief Justice Renato Corona.

Busa alang sa mga nagduda kun may igo pa ba nga oras alang sa impeachment, way imposible sa mga tawong disidido ug determinado. Interesting hinuon unsay mamahimong kamada didto sa Senado kun ugaling moabot ang reklamo didto tungod kay nag-angat raba ang eleksiyon.