Meralco itinabla ang serye sa 1-1
MANILA, Philippines — Nalustay ng Meralco ang maagang bentahe nito sa halftime bago magpakawala ng panapos na boltahe upang kuryentehin ang Barangay Ginebra, 103-91, sa Game 2 ng kanilang best-of-seven semis series sa 2024 PBA Philippine Cup kahapon sa Mall of Asia Arena.
Natunaw ang 13-point lead ng Bolts subalit bumalikwas sa dulo sakay ng pambihirang 30-17 ratsada sa fourth quarter upang makaganti sa Gin Kings matapos ang dikit na 92-88 kabiguan sa Game 1.
Tabla na ang magkaribal sa 1-1 rekord papasok sa krusyal na Game 3 ng kanilang race-to-four Final Four duel sa Miyerkules sa Cavite.
Nag-akbay sina Allein Maliksi at Chris Newsome sa naitalang 25 at 20 puntos, ayon sa pagkakasunod, habang 11 puntos at 8 rebounds si Chris Banchero.
Tumabo naman ng solidong double-double na 13 puntos at 10 rebounds si Cliff Hodge kasama na ang 6 na offensive boards lalo na sa huling mga minuto ng kanilang fourth-quarter breakaway.
Nag-ambag din ng 7 puntos si Raymond Almazan tampok ang limang sunod sa crunchtime upang tulungan ang Bolts na makakalas mula sa katiting na one-point lead.
Sumandal ang Gin Kings kay Christian Standhardinger sa 32-18 balikwas nila para maagaw ang unahan, 74-73, hanggang sa unti-unti itong mabawi ng Meralco.
- Latest
