Sekreto

(Bana nagpinal)

Bitoy: Day Niyang sa di pa ko mamatay motug-an ko nimo nga nakasala ko sa atong kaminyoon.

Senyang: Ayaw na pagsaba Dong, dugay na kung nasayod ana, mao bitaw’ng gihiloan tika (Toink!/Aguy!)

Hehehehehehehehehehehehehe!

Nganong ang mga sekreto sagad mabulgar kun ang hingtungdan himalatyon na o mahamutang sa usa ka sitwasyon nga nag-ung-ong ang kinabuhi sa kamatayon.

Nahimuot ko sa estorya sa akong higala nga beteranong maniniyot sa pikas pamantalaan Alex Badayos nga usa ka kauban sa buhat motug-an na unta sa iyang kapikas sa sala nga iyang nahimo atol atong kaguliyang sa alarma sa tsunami sa Siyudad sa Sugbo. Maayo na lang kay dihang iya na untang isulti wala matagad sa iyang kapikas ang buot niyang ikompisal tungod sa ilang paningkamot pagdagan. False alarm ra ba ang tsunami (Aguy!/Toink!).

Kun dunay mga sekreto nga makadaot duna say mga sekretong makaayo apan ang labing kuyaw nga sekreto ang sekreto nga dili iya sa hingtungdang nagtipig.

Bitoy: Abi nimo lab dili ko gusto nga duna tay mga sekreto, gusto ko nga walay tagoay.

Senyang: Mao ba lab, usa ra man sad akong sekreto nimo lab.

Bitoy: Bisan usa lang dili na maayo. Sultii ko unsa may imong sekreto?

Senyang: Ay masuko niya ko.

Bitoy: Nganong masuko man ka, ako maoy angay masuko kay duna kay sekreto. Bi lab tug-ani ko unsa may imong sekreto?

Senyang: Kuan! Ang akong sekreto nimo nga nasayod kong giuyab nimo si Kumare (Toink!Ayay!) Hala! Hehehehehehehehe!

Naa sa sekreto ang kahinam ang ani karon sa mga batan-on uso ang linyang “sekreto para bibo”. Kun gusto kang masayod unsay paagi nga siguradong sekreto gyud ang imong sekreto ang epektibong paagi sekreto (Toink!/Aguy!)

(Dihay bata nakabulgar og sekreto)

Bitoy: Mommy kahibawo baya ko sa imong sekreto.

Mommy: Ha! Nasayud ka! Dong niay 500 oh ayaw saba sa imong Daddy ha.

Bitoy: Aha! Ingon ini ra diay kasayon ang kuwarta.

(Pag-abot sa iyang Daddy)

Bitoy: Daddy kahibawo baya ko sa imong sekreto.

Daddy: Ha! Nasayud ka Dong… O niay 1000 ayaw og saba sa imong Mommy ha (Hastang lipaya sa bata, pagduol niya sa ilang driver)

Bitoy: Yayo Buloy kahibawo baya ko sa imong sekreto.

Buloy: Ha! Tinuod ka Dong, nasayod ka sa akong sekreto?

Bitoy: O Yayo kabawo jud ko.

Buloy: Ato ra na Dong ha ayaw saba ni Daddy mo, hala amin ni Papa mo (Aguy!/Tuara!) Hehehehehehehehehehehehe!

(email: [email protected])