Opisyales sa Minglanilla gipangkasohan

CEBU, Philippines — Ang Office of the Ombudsman mipasaka og pormal nga kasong graft diha sa Regional Trial Court sa City of Naga batok sa suspendidong mga opisyales sa lungsod sa Minglanilla.

Ang gikasohan mao silang Mayor Rajiv Enad, Bise Mayor Elanito Peña, 10 ka miyembro sa Sangguniang Bayan, ug sa municipal administrator tungod sa kontrobersyal nga pagbalibad sa usa ka rehabilitation plan sa Sitio Napo, Barangay Guindarohan.

Gipasaka ang kaso tungod sa matud pa paglapas sa Section 3(e) sa Republic Act No. 3019 o Anti-Graft and Corrupt Practices Act nilang Enad, Peña, mga konsehal nga sila Oscar Cañares Dela Calzada Jr., Samuel Gordsin Adlawan Jr., Jesus Denoyo Velez, Jeremias Llanos Cañares, Jaime Secretarya Caumeran, Jenifer Dejan Lariosa, Proserfina Laput Fajutrao, Jenny Zafra Young, Petronilo Entera Traya ug Rick Ryan Zafra, apil usab si Municipal Administrator Junrie Casquejo Bragat.

Sa usa ka press release nga giluwtan sa Office of the Ombudsman, ang kaso mitumaw gikan sa balik-balik nga pagbalibad sa lokal nga kagamhanan sa pag-aprobar sa rehabilitation plan nga gisumite sa Jomara Konstruct Corporation ug Jomara Agri Foods and Supply Corporation.

Ang isyu nagsugod niadtong Disyembre 2021 human nadiskubrehan ang nangliki nga yuta ibabaw sa usa ka quarry site.

Ang geohazard assessment sa Mines and Geosciences Bureau (MGB) maoy nakapadasig sa Environmental Management Bureau (EMB) sa pag-isyu og cease-and-desist order.

Aron matubag ang mga isyu sa kaluwasan, ang mga complainant nag-andam og rehabilitation plan nga gisuportahan og teknikal nga rekomendasyon sa MGB, EMB ug Provincial Environment and Natural Resources Office (PENRO).

Apan gikatahong gibabagan kini sa maong mga opisyales ug nipasar sila og mga resolusyon nga nagbalibad sa rehabilitation plan ug sa aplikasyon sa mga kompanya alang sa Special Waste Disposal Permit.

Nakitaan sa Ombudsman og probable cause ang pagpasaka og kaso, ug giingon sad nila nga ang mga respondents o ang mga opisyales sa lungsod nagpakita og “evident bad faith, manifest partiality, or gross inexcusable negligence” sa ilang pagbalibad sa rehabilitation plan bisan pa og adunay partial lifting sa cease-and-desist order gikan sa Department of Environment and Natural Resources (DENR) aron tugotan ang implementasyon niini.

Sa resolusyon, giingon sa Ombudsman nga gibalewala sa mga respondents ang findings ug rekomendasyon sa DENR, PENRO, MGB ug sa Sangguniang Barangay sa Guindarohan.

Sa laing bahin, gi-dismiss sa Ombudsman ang reklamo batok sa acting Sangguniang Bayan secretary tungod sa kakulang sa merito.

Si Enad, Peña ug ang 10 ka konsehal kasamtangang suspendido og usa ka tuig ubos sa mando sa Office of the Ombudsman niadtong Pebrero ning tuiga.

Ang JOMARA Konstruct Corporation nihangop sa desisyon sa Office of the Ombudsman nga i-elevate ang kaso gikan sa administrative proceedings ngadto sa criminal charges sa korte. IBM BANAT NEWS