Salamat nga nag-unay
Naklaro sa nagpadayong impeachment trial ni Bise Presidente Sara Duterte nga sa dihang gi-imbento sa iyang mga sinaligan ang mga ngalan sa recipients sa iyang confidential funds (mahimo ganing nangaon sila og chichiriya) walay bisan usa nila nga nagtuo nga dunay magtagad pagsusi sa ilang binuang.
Kay niadtong 2022 ug 2023 sikit pa sa ampaw sa Carcar silang VP Sara ug Presidente Ferdinand Marcos Jr. Nga ang budget ni VP Sara gi-aprobahan sa mga kongresista ug mga senador sulod lang sa pipila ka minuto (walay bisan gamay na lang debate).
* * *
Naapiki lang karon si VP Sara kay kaaway na siya sa administrasyon. Apil sa mga rason sa grabe niyang kasuko sa Malakanyang mao ang kalisod pagdawat nga ang sayon kaayo nga mga palusot sa una gikuti-kuti na karon.
Labaw sa kauwaw (kay nasakpan ang ilang pataka) mao ang makapasapot nga trabaho sa pagpasabot (nga masubay sa livestream nga peligro nga nakit-an sa lunod patay nilang mga dumadapig sa Pilipinas ug ubang kanasuran) sa kabinuang sa mga ngalan nga ilang gisuwat ug gibuot-buotan og pirma sa gatosan ka acknowledgment receipts.
* * *
Kon wala pa mabungkag ang UniTeam, mahimong magpabilin nga sekreto ug mapun-an pa gani tingali og mas daghan ang gidudahan nga gibolsa nga confidential funds sa Office of the Vice President (ug mahimo ganing si VP Sara pay hawod sa Department of Education).
Mahimo nga ang Ginoo naglihok gyod sa misteryusong mga paagi. Daghang salamat sa ilang panag-unay. Pero ka wala gyod diay untay dag-anan sa mga magbubuhis kon padayong nagkasabot ang mga balhibuon og kamot.
* * *
Hinaut nga dili sab mataligam-an pagpasalamat ang puwersa sa yuta nga taguon lang nato sa ngalan nga Commission on Audit (COA). Ilang findings ang nakabisto sa mga pakauwaw ni VP Sara ug sa mga nagpasiugda sa flood control projects ug ubang mga anomaliya.
Maong padayong giisnab sa Malakanyang ug Kongreso ang dugay nang awhag sa COA nga dugangan ang ilang budget. Aron makakuha og mga abogado nga mopasaka og mga kaso batok sa mga opisyal sa gobyerno nga ilang masakpan nga manguwarta. Kay nahibawo ang mga politiko nga silay unang mapa-akan. Kon duna nay ngipon ang COA.
* * *
- Latest
