National boxing team maaga ang preparasyon
MANILA, Philippines — Sinimulan na ni two-time Olympian Nesthy Petecio ang kanyang preparasyon para sa mga lalahukang training camp at international boxing competitions ngayong 2025.
Kahapon ay nag-post si Petecio ng kanyang litrato kasama ang national coaching staff ng Association of Boxing Alliances in the Philippines (ABAP) sa Teachers Camp, Baguio City.
Magtutungo si Petecio at ang mga national boxers sa training camp sa Korea sa Abril para paghandaan ang World Championships sa Liverpool sa Setyembre.
Isasalang din ng ABAP ang tropa sa World Cup sa New Delhi, India sa Nobyembre at sa 33rd edition ng Southeast Asian Games sa Thailand sa Disyembre.
Nagmula si Petecio sa pagsuntok sa bronze medal sa nakaarang 2024 Paris Olympics kagaya ng kinolekta ni Aira Villegas.
Inaasahang susunod sa 32-anyos na si Petecio sa Teachers Camp sina Villegas, Carlo Paalam, habang wala pang desisyon sina Eumir Felix Marcial at Hergie Bacyadan.
Sina Petecio at Paalam ay nag-uwi ng silver medal at nagdagdag ng bronze si Marcial noong 2020 Tokyo Olympics kung saan binuhat ni lady weightlifter Hidilyn Diaz ang unang Olympic gold ng Pilipinas.
Bukod sa national team ay nakatutok na rin si Marcial sa kanyang professional boxing career, samantalang nasa kampo ng vovinam team si Bacyadan.
- Latest
