Subpoena sa financial records ni VP Sara, isinilbi na
MANILA, Philippines — Sinimulan na ng Senate impeachment court ang pagsisilbi ng mga subpoenas sa iba’t ibang bangko at concerned agencies na inaaatasan na isumite ang financial records ni Vice President Sara Duterte, mister nitong si Atty. Manases Carpio, at mga negosyo na may kaugnayan sa kanila.
Ayon kay Impeachment Clerk of Court Atty. Renato Bantug Jr. ipinadala ang mga subpoena alas-8:40 ng umaga nitong Miyerkules sa Bureau of Internal Revenue (BIR), Anti-Money Laundering Council (AMLC), at sa mga sumusunod na bangko/Metropolitan Bank and Trust Co., Philippine Savings Bank, Bank of the Philippine Islands (BPI), Security Bank Corp., Land Bank of the Philippines (LandBank), at BDO Unibank.
Nauna nang inatasan ng korte ang mga bangko at ang BIR na tumugon sa subpoena at isumite ang mga hinihinging rekord bago mag-alas-9:00 ng umaga sa Hulyo 30.
Hiniling ng mga House prosecutors ang pagpapalabas ng mga subpoena para sa mga financial records ni Duterte kaugnay ng kanilang alegasyon na nagkamal umano ito ng hindi maipaliwanag na yaman.
Mula 2007 hanggang 2013 pa lamang, sinabi ng mga prosecutor na lumampas sa P3 bilyon ang mga transaksyong pinansyal ni Duterte batay sa mga rekord ng AMLC.
- Latest
