Pacers buhi pa, mipuwersa og game 7 batok sa Knicks

CEBU, Philippines — Ang Indiana Pacers milampornas sa New York Knicks, 116-103, aron pagpuwersa og Game 7 sa ilang NBA Eastern Conference semifinal series kagahapon didto sa Gainbridge Fieldhouse sa Indianapolis, Indiana.

Si Pascal Siakam maoy nangu sa Pacers uban ang 25 puntos. Midugang si Tyrese Haliburton og 15 puntos ug siyam ka assists samtang si Myles Turner mitali og 17 puntos alang sa Indiana nga dunay unom ka players nga mikadlit og double figures.

Bukid pa hinoon ang tungason ang Pacers gumikan kay ang tinagakay nga duwa adto man mahitabo sa korte sa Knicks karong Lunes.

Sikit ang ilang engkwentro sa sinugdanan apan ang Pacers milusad og nagbagang 17-2 run aron pagposte og 13 puntos nga labaw sa naghinapos nga bahin sa ikaduhang kuwarter.

Ang alas sa Knicks nga si Jalen Brunson nalimitahan ngadto lamang sa singko puntos sa first half. Namawi hinoon siya sa ikatulong kuwarter diin siya mibomba og 14 puntos dayon na ngadto sa pagtapos bitbit ang 31 puntos.

Si Miles McBride mitampo og 20 puntos apan dili kini igo sa Knicks pagpuhal sa balanseng ataki sa Pacers.

Natiwasan pa ang Knicks gumikan kay ang pambato nilang forward nga si Josh Hart mibiya sa sayong bahin sa katapusang kuwarter kay nagsakit ang tiyan nga iya nang nabatyagan sa unang kuwarter pa lamang.

Ang Knicks napiangan nang daan kay wala ang duha nila ka mga haligi nga sila si OG Anunoby ug Julius Randle nga parehong dunay gihambin nga injury.