EDITORYAL - Luwas nga Kalag-Kalag

Naghinayhinay na og pangabot ug nanuaw karong adlawa, Sabado, Oktobre 31 sa mga nagkadaiyang sam-ang ang milyon-milyong mga Pilipino para duawon ang ilang mga minahal sa kinabuhi sa tinguhang dili maabtan sa pagpunsisok sa mga tawo sa Nobiyembre 1 ug 2.

Maong karon palang, nagpanon na ang mga tawo bitbit ang mga buwak, kandila, rosaryohan kauban ang mga manalabtan para iampo ang mga kalag sa ilang mga nitaliwan na sa laing kalibotan nga mga minahal sa kinabuhi.

Ang mga otoridad ug mga lokal nga kagamhanan duna nay gibuhat nga preparasyon para sa kasigurohan ug kaluwasan sa tanang moduaw sa mga sam-ang, kinahanglan lang gyud kining sundon sa publiko.

Sama sa gihapon, daghang mga gidili nga mga butang nga madala sa sulod sa mga sam-ang, likayan nalang gyud unta sa mga tawo ang pagdala niini aron dili na maaberya pa sa ilang pagsulod .

Sa pikas bahin, magmatngon pud ang mga tawo sa ilang pagpanglakaw o pagbiya sa ilang mga balay, siguraduhon nga sirado, gipang-ibot ang mga electrical appliances ug dili magbilin og giduslitang kandila sa mga altar para sa malikay sa sunog.

Sa samang higayon, kung dili gani kaya sa panglawas ilabi na para sa mga senior citizens ug mga bata, dili nalang pugson og adto. Mas labing maayong adto nalang sa balay ug iampo ang mga kalag sa mga nitaliwan.

Kung dili gyud malikayan nga dili makaadto sa sam-ang, siguraduha nga dili init ang panahon, tumar daan sa mga maintenance medicines, inom ug magbawon og kaugalingong tubig mainom ug ingon man pagkaon.

Likayan pud ang pagdala ug pagsul-ob og mga alahas aron dili matintal ang mga kawatan ug dautang tawo para magbuhat og dautan.

Para pud sa mga mobiyahe, kung mag-commute mas labing maayong mosayo og adto sa mga terminal aron dili maabtan sa pagdasok sa mga pasahero.

Kung dunay kaugalingong sakyanan, siguraduhon ang BLOWBAGETS o ang Battery, Lights, Oil, Water, Brakes, Air, Gas, Engine , Tires ug Self o kaugalingong kaandam pagbiyahe og layo.